Foto: DSM
Almatyda Kardiologiia jáne ishki aýrýlar ǵylymi-zertteý institýtynda kúrdeli júrek transplantatsiiasy operatsiiasy sátti júzege asyryldy, dep habarlaidy Ult.kz.
Operatsiiany kardiohirýrgiia bólimshesiniń meńgerýshisi Rústem Tóleýtaev, UMC «Júrek ortalyǵynyń» mamany Svetlana Novikova jáne anesteziologtar men kardiohirýrgtar toby júrgizdi.
Donor Almatynyń Ortalyq qalalyq aýrýhanasynda midyń ólimi tirkelgen 40 jastaǵy er adam boldy. Júrek Talǵar aýdanynda turatyn 43 jastaǵy patsientke aýystyryldy. Ol sozylmaly júrek jetkiliksizdigi, ishemiialyq kardiomiopatiia jáne júrek qaqpaqshalarynyń jetispeýshiligi diagnozymen aýyrǵan.
Patsient buǵan deiin miokard infarktisin ótkerip, júreginiń kóp bóligi tyrtyqtanyp, jiyrylmai qalǵan. Emdeý sharalaryna qaramastan, jaǵdaiy nasharlap, júrekti transplantatsiialaýǵa kezekke turǵyzyldy.
Kardiologiia ǴZI basqarma tóraǵasy Marat Pashimovtyń aitýynsha, júrek transplantatsiiasy júrek jetkiliksizdiginiń sońǵy satysyndaǵy naýqastardy emdeýdiń tiimdi ádisi bolyp tabylady. Alaida donorlyq aǵzalardyń jetispeýshiligi bul múmkindikke muqtaj barlyq naýqastarǵa kómektesýge kedergi keltiredi. Qazirgi tańda Qazaqstanda júrekti transplantatsiialaýǵa kezekte 139 eresek jáne 7 bala tur.
Operatsiiadan keiin patsienttiń jaǵdaiy turaqtalyp, oń dinamika baiqaldy. Ol reanimatsiiadan beiindi bólimshege aýystyryldy.
