Energetika ministri Qanat Bozymbaev elimizdiń basty munai óndirý oryndarynda óndiristi ulǵaitý úshin qandai jumystar atqarylǵaly jatqanyn aityp berdi, dep habarlaidy QazAqparat tilshisi.
«Aldymen, quny 36,8 mlrd AQSh dollary turatyn (onyń ishinde 32 paiyzy, 12 mlrd AQSh dollary qazaqstandyq úleske tiesili) Teńizde búgingi tańda 46 myńnan astam qazaqstandyq jumys isteidi. 400-den astam otandyq servistik kompaniia qurylys, metalqurylymdaryn shyǵarý jáne taǵy da basqa jumystarǵa tartyldy. Al Qashaǵanda táýligine 330 myń barrel kóleminde munai turaqty túrde óndirilip jatyr. Óndiristi arttyrý jobalary belsendi túrde jalǵasýda. Sonymen birge, bolashaqta Qashaǵan jobasyn keńeitý tujyrymdamasy boiynsha taldaý jumystary bastaldy. Aldyn ala boljam boiynsha 2024 jylǵa qarai óndiris kólemi táýligine 450 myń barrelge jetkizilmek», - dedi Qanat Bozymbaev OQK-da ótken baspasóz máslihatynda.
Ministrdiń aitýyna qaraǵanda, Qarashyǵanaq jobasy boiynsha Qarashyǵanaq konsortsiýmynyń aktsionerleri arasyndaǵy daý sheshilip, tiisti kelisimge qol qoiylǵan.
«1,1 mlrd kóleminde (2019-2021 jyldary) shyǵyndy óteýdi jáne 2037 jylǵa deiin munai baǵasy barreline 60 dollar bolǵan jaǵdaida respýblikanyń úlesin 360 mln AQSh dollaryna ulǵaitý týraly negizgi ýaǵdalastyqtarǵa qol jetkizildi. Sonymen qatar, Qarashyǵanaqta uzaq merzimge munai óndirýdiń joǵary deńgeiin saqtaý úshin jańa uńǵymalardy burǵylaý, keńeitý jumystaryna aldaǵy 5 jylda 5 mlrd AQSh dollary investitsiia baǵytalatyn bolady», - deidi ol.
Qanat Bozymbaev atap ótkendei, 2018 jyly Jer qoinaýy jáne jer qoinaýyn paidalaný týraly kodeks pen Salyq kodeksiniń jańa normalar kúshine engen. Osy zańnamalyq ózgerister jer qoinaýy salasynyń, sonyń ishinde teńiz jobalaryn investitsiialaýdaǵy tartymdylyqty kúsheitip otyr. Soǵan bailanysty, QazMunaiGaz ben ENI kompaniiasymen Isatai jobasyn iske asyrýdy bastap ketken.
«ENI kompaniiasymen Abai jobasy jáne Lýkoil kompaniiasymen Kaspii teńiziniń qazaqstandyq sektoryndaǵy Jeńis jobasyna qatysty kelisimderdiń sharttary talkylanyp jatyr. Osyndai jobalardy júzege asyrýdyń arqasynda investitsiialardy tartýǵa, óndiris kólemin arttyryp, salyq túsimin kamtamasyz etýge múmkindik zor», - dedi Qanat Bozymbaev.
