QR Energetika ministrligi, QR Qarjy ministrligi jáne ókiletti organ – «PSA» JShS arqyly áreket etken Qazaqstan Úkimeti, sondai-aq Qarashyǵanaq jobasynyń aktsionerleri – Eni, Shell, Shevron, Lýkoil kompaniialary daýdy sheshýdi aiaqtaý jóninde kelisimge qol qoidy, dep habarlaidy "Ult aqparat".
Esterińizge sala ketsek, Qarashyǵanaq jobasy Qazaqstan Respýblikasynyń Úkimeti, Shell (29,25%), ENI (29,25%), Shevron (18%), Lýkoil (13,5%) sheteldik kompaniialar aliansy jáne QazMunaiGaz (10%) arasynda jasalǵan Ónimdi bólý týraly túpkilikti kelisim aiasynda iske asyrylýda. 2015 jyly respýblika konsortsiýmnyń paidany bólýimen jáne ádisteme boiynsha esepteýlerimen kelispeitinin bildirdi. Osy kommertsiialyq kelispeýshilik nátijesinde Qazaqstan Ónimdi bólý týraly túpkilikti kelisimniń talaptaryna sáikes halyqaralyq tórelikke júgindi. Tórelik protsesi júrip jatqan kezde Úkimet pen Konsortsiým ózara qolaily sheshim tabý jáne kelispeýshilikterdi sheshý úshin kelissózder júrgizgen edi.
Energetika ministrliginiń málimetinshe, daýdy aiaqtaý týraly kelisim aiasynda Konsortsiým Qazaqstan Respýblikasyna 1 milliard 305 million AQSh dollary kóleminde tólem jasap, taraptar ónim bólýdiń túpkilikti ádistemesin kelisti. Nátijesinde Qazaqstan 2037 jylǵa deiin qosymsha 600 million AQSh dollaryn (munai baǵasy 1 barrel úshin 40-50 AQSh dollary bolǵan kezde) alady. Sonymen qatar taraptar Qarashyǵanaq ken ornyndaǵy óndirý deńgeiin odan ári ustap turý maqsatynda Qarashyǵanaq-1 (A) keńeitý investitsiialyq jobasyn iske asyrýdyń bastalýyn maquldady.
Qarashyǵanaqty keleshekte keńeitý jobasynyń (QKJ (1A) investitsiialyq kólemi shamamen 1 milliard AQSh dollaryn quraidy jáne gazdy keri aidaý kompressoryn jáne onymen bailanysty qondyrǵylardy salýdy kózdeidi. Bul suiyq kómirsýtekter óndirý kólemin jylyna 10-11 mln deńgeiinde ustap turýǵa múmkindik beredi. QKJ (1A) iske asyrý jergilikti qamtýdyń eń az úlesin taýarlardy, jumystar men kórsetiletin qyzmetterdi satyp alýda 45 jáne personaldy jaldaýda 75 paiyz mólsherinde qamtamasyz etýdi kózdeidi. Keiinnen taraptar jobanyń tehnikalyq-ekonomikalyq parametrlerin eskere otyryp, QKJ 1 (V) iske asyrýdyń kelesi kezeńin júzege asyrý múmkindigin qarastyrdy.
«Qazaqstan Respýblikasy Úkimetiniń resmi ókiliniń aitýynsha, taraptar daýdy aiaqtaý týraly kelisimge qol qoiý arqyly uzaq merzimdi daý máselesinde sońǵy núkte qoidy. Kelispeýshiliktiń máni – ónimdi jáne sáikesinshe aqshalai kiristi taraptar arasynda ádil bólý. Respýblika qatań túrde qol qoiylǵan kelisimshart talaptaryna jáne qoldanylatyn zańnamaǵa sáikes áreket etkenin atap ótken jón. Uzaq jáne qiyn kelissózder nátijesinde taraptar daýdy bitimgershilikpen sheshýge qol jetkizdi. Bul respýblikanyń investorlarmen týyndaityn daýlardy kelisimshart erejelerine sáikes ózara qolaily sheshýge beiimdiligin kórsetti», - dep atap ótken ministrlikten.
