QR IIM ákimshilik politsiia komiteti tóraǵasynyń orynbasary Serik Túsipov qystygúni alys jolǵa shyǵatyn kólik júrgizýshilerine abai bolýdy eskertti, dep habarlaidy "Ult aqparat".
«Qysta kólik júrgizýdiń óz ereksheligi bar. Birinshiden, aýa raiynyń ózgerýine bailanysty abai bolǵan abzal. Qazaqstannyń klimaty shuǵyl ózgeretindikten, júrgizýshiler jol ústinde daiyn bolýy kerek. Mysaly, eldiń ortalyq, soltústik jáne batys aimaqtarynda boran soǵyp, aiaz uiytqyp, jol kóktaiǵaq bolyp turady. Osynyń saldarynan qozǵalysty shektep, joldy tazartýǵa biraz ýaqyt jumsalady. Al ońtústik jáne shyǵys jaq taýly keletindikten, joldy qar basyp, tuman jii túsedi», - dedi IIM baspasóz máslihatynda Serik Túsipov.
Osyǵan bailanysty júrgizýshiler aimaqtardyń aýa raiy boiynsha aiyrmashylyqtaryn eskere otyryp, sinoptikterdiń habarlamalaryn qadaǵalap otyrýy tiis. Jolǵa shyǵýdy josparlaǵanda saq bolǵan abzal.
«Alys jolda kele jatyp aýa raiy buzylyp ketse jaqyn jerdegi eldimekenge jetip alyp, kún raiynyń saiabyrlaǵanyn kútińiz. Al eger avtokólikte qalǵanym jón dep sheshseńiz, mindetti túrde qutqarý qyzmetine habar berý kerek. Qarasha aiy bastalǵaly aimaqtarda kóktaiǵaqqa bailanysty jol jeti ret jabyldy. Al 2019 jyly avtokólik qozǵalysy 985 ret shektelgen bolatyn», - deidi ol.
