Ulttyq banktiń aqsha-kredit saiasaty departamentiniń direktory Jandos Shaimardanov qarasha aiyndaǵy iskerlik belsendilik indeksi týraly aityp berdi, dep habarlaidy "Ult aqparat".
Iskerlik belsendilik indeksi qarasha aiynda birshama ósip, 48,8-den 49,4 kóterilip, 0,6 tarmaqqa jaqsara tústi.
«Indekstiń ósýine qurylys salasyndaǵy jaǵdaidyń jaqsarǵany áser etti dese de bolady. Aitalyq, osy jyldyń aqpan aiynan beri, iaǵni bul sala alǵash ret qazandaǵy 47,6-dan 52,5-ke kóterildi. Degenmen ónerkásip pen qyzmet kórsetý salalarynda, sáikesinshe, jaǵdai sol kúii – 49,6 jáne 48,7. Aimaqtar arasynda qarasha aiynda iskerlik belsendilik Soltústik Qazaqstanda, Túrkistan oblysy men Shymkent qalasynda áldeqaida jaqsarǵan. Al, kerisinshe, indeks Batys-Qazaqstan oblysynda birshama tómendep otyr», – dedi Jandos Shaimardanov.
Onyń aitýynsha, biznes indeksiniń kórsetkishi qarashada 1,3 boldy (osy jyldyń qazan aiynda - 0,0 edi), bul – óz kezeginde biznes júrgizýge jaqsy jaǵdai jasalǵanyn kórsetedi. Iaǵni, kásiporyndar qazirgi biznespen bailanysty jaǵdaiǵa jaqsy baǵa berip otyr. Respondentter biznes júrgizýdegi jaǵdaidyń jeltoqsan aiynda da jaqsara túsetinine kámil senedi. Oǵan berilgen boljamdy baǵa – 4,3.
Iskerlik belsendilik indeksi kásiporyndar arasynda júrgizilgen saýalnamaǵa negizdelip jasalady. Olardyń qazirgi kórsetkishteri, keleshektegi ózgeristerge degen boljamdary – bári eskeriledi. Qarasha aiynda mundai saýalnamaǵa 451 kásiporyn qatysty: qurylys – 64, ónerkásip – 169, qyzmet kórsetý salasy – 218.
