Karantinge qatysty jeńildikter engizilýine bailanysty 1 sáýir men 1 qazan aralyǵynda mindetti áleýmettik meditsinalyq saqtandyrý júiesine túsetin qarjy kólemi 85,6 mlrd teńgege azaimaq. Onyń 29,4 mlrd teńgesi tólemnen bosatylǵan shaǵyn, orta jáne iri biznes nysandaryna tiesili. Bul týraly «Áleýmettik meditsinalyq saqtandyrý qory» kommertsiialyq emes AQ Almaty qalalyq filialynan málim etti.
Habarlamaǵa súiensek, biyl ekinshi toqsanda saqtandyrylmaǵandar úlesi 15 protsentke jýyqtaidy. Atalǵan sanatqa mindetti meditsinalyq saqtandyrý paketi sheńberinde shamamen 13,4 mlrd teńgeniń qyzmeti kórsetilmek. Taǵy 8 mlrd teńge shyǵyn shaǵyn, orta jáne iri biznestiń 925 myń qyzmetkeriniń jarna tóleý merziminiń keiinge shegerilýine qatysty túspeidi. Osyndai faktorlardyń bárin esepke alsaq, meditsinalyq saqtandyrý júiesine túsetin qosymsha júkteme 134 mlrd teńgeden asyp jyǵylmaq», - dedi qordyń baspasóz qyzmetinen.
Esterińizge sala ketsek, sáýir aiynda saqtandyrý júiesindegi jeńildik merzimi 1 shildege deiin uzartylǵan bolatyn. Jańa tártip boiynsha, saqtandyrylmaǵan azamattar mindetti áleýmettik meditsinalyq saqtandyrý paketindegi qyzmetterdi taǵy úsh ai paidalanýǵa múmkindik aldy.
«Halyqtyń birqatar sanattary men biznes nysandary úshin saqtandyrý tólemderin tóleý merziminiń uzartylýy, valiýta baǵamynyń ózgerýi, karantin kezinde birqatar meditsinalyq qshyzmet túrleriniń qysqarýy emhanalar men aýrýhanalardyń qarjylyq jaǵdaiyna keri áser etti. Sondyqtan MSQ emdeý uiymdarynyń qarjylyq turaqtylyǵy men azamattarǵa meditsinalyq kómektiń tolyqqandy kórsetilýin qamtamasyz etý sharalaryn qolǵa aldy», - delingen habarlamada.
Osy maqsatta meditsina uiymdarynyń qarjylyq turaqtylyǵyna analiz jasaldy. Saraptama nátijesi boiynsha meditsinalyq qyzmetterdi kórsetýshiler shartty túrde tórt topqa bólindi. Olar:
Itop. Kórsetiletin qyzmet kólemin tómendetpegen bastapqy meditsinalyq-sanitarlyq kómek uiymdary (emhanalar), jedel járdem qyzmeti, onkologiialyq, psihiatriialyq jáne týberkýlez dispanserleri t.b.
IItop. COVID-19 infektsiiasyna qarsy is-sharalarǵa jumyldyrylǵan, sonyń saldarynan kishigirim bolsa da qarjy tapshylyǵyna urynǵan, josparlanǵan meditsinalyq kómek kólemin tolyq kórsetý múmkindigi az meditsina uiymdary.
III topqa qarjy tapshylyǵy qaýpi tónip turǵan, karantin saldarynan kórsetiletin qyzmet kólemi (sonyń ishinde, aýrýhanaǵa josparly túrde jatqyzyp emdleý) kúrt qysqarǵan emdeý mekemeleri jatady.
IV topqa konsýltativtik-diagnostikalyq qyzmetterdi qosymsha atqarýshylar jatady.
Qarjylyq turaqsyzdyqtyń aldyn alý maqsatynda Qor emdeý mekemelerine qosymsha avans tóledi, jyl basynda berilgen aldyn ala tólemdi ustap qalý grafigine ózgerister engizdi. Sonymen qatar, ekinshi toqsanda igerý múmkin bolmaityn qarjy qaita bóliske salynyp, 2020 jyldyń ekinshi jartysynda jumsalatyn boldy. Bul meditsina uiymdarynyń jyldyq jospardy oryndaýyna múmkindik beredi.
