Nur-Sultan men Almatyǵa jaiaý kirýge de jol bermeý kerek. Bul týraly Aqordada Tótenshe jaǵdai jónindegi memlekettik komissiianyń otyrysyn ótkizgen QR Prezidenti Qasym-Jomart Toqaev aitty, dep habarlaidy "Ult aqparat".
«Qazirgi ýaqytta álemde aýrýdyń jańa jaǵdailarynyń eń kóp sany qatań karantin sharalaryn tym kesh engizgen elderde tirkelip jatyr. Infektsiianyń sel siiaqty taralýynyń aldyn alý úshin oqshaýlaý sharalaryn kúsheitý qajet. Ózge elderdiń oń jáne teris tájiribelerine qatysty únemi túsip jatqan aqparattardy eskere otyryp, meditsinalyq júiemizdi jaǵdaidyń odan ary órbýiniń kez kelgen nusqasyna daiyndyq jalǵastyrý qajet. Kóńildi jailandyryp, qoldan kelgenniń barlyǵyn jasadyq deýge bolmaidy. Elorda men Almatyda karantindik aýmaqty tolyqtai qorshaýdy qamtamasyz etý, qalaǵa jaiaý kirý múmkindikteriniń jolyn kesý mańyzdy. Taiaý ýaqytta ózge de iri eldi mekenderdi jabý qajettigin aiqyndaý kerek», - dedi Memleket basshysy.
Qazaqstan Prezidenti karantinge jatqyzylǵan adamdarǵa qoiylatyn talaptardy buzǵandarǵa jazany kúsheitý qajettigi týyndap otyrǵandyǵyn da basa aitty.
«Azamattardyń qaýipsizdigin qamtamasyz etý úshin meniń Jarlyǵymmen adamdar jappai jinalatyn nysandardyń jumysy shektelip, túrli sharalar ótkizýge tyiym salyndy. Degenmen, shekteýdiń jii buzylatyndyǵyn da kórip otyrmyn. Osy jyldyń 16 naýryzynan beri Aqmola, Atyraý, Shyǵys Qazaqstan, Qaraǵandy, Qostanai, Pavlodar, Soltústik Qazaqstan jáne Túrkistan oblystaryn qosa alǵanda tótenshe jaǵdai rejimin buzýdyń 18 faktisi oryn aldy. Kináli tulǵalar eskertý nemese aiyppul túrindegi ákimshilik jaýapkershilikke tartyldy. Barynsha qatań santsiialarǵa kóshetin kez keldi. Sonymen qatar mundai faktilerdi aldyn alý maqsatynda BAQ-ta keńinen jariialaý qajet», - dedi Qasym-Jomart Toqaev.
