«Atameken» ulttyq kásipkerler palatasynyń basqarma tóraǵasy Abylai Myrzahmetov Tótenshe jaǵdai kezinde kásipkerlerdiń qandai qiyndyqtarǵa ushyraǵanyn aityp berdi, dep habarlaidy QazAqparat.
«Biz bastapqydan biznestiń pýlsin seziný úshin anketa jasaý tásilin engizdik. Búgingi kúnge deiin 40 myń adam júgindi. Elimizde 1,6 mln adamnyń biznesi qyzmet kórsetý, týrizm, meiramhanalar men dámhanalar jelisimen bailanysty. Elimizde 856 myń jeke kásipker bar. Millionǵa jýyq mikrobiznes ókilderi, 1168 iri biznes sýbektileri bar. Bes myńnan astam orta biznes, eki myńnan astam shaǵyn biznes bar. Iaǵni, jalpy eseppen bir million sýbekt karantin saldarynan zardap shekti», - dedi A. Myrzahmetov onlain suhbat barysynda.
Ótinimderdiń 85 paiyzy tabysynan aiyrylǵan shaǵyn jáne orta biznes ókilderinen túsken.
«Mikrobiznestiń 50 paiyzy qyzmetkerlerin demalysqa jiberýge májbúr bolǵanyn jazdy. 20 paiyzynyń jospary buzylyp, jumysshylaryn qysqartýǵa jiberedi. Mikrobiznes jaldaý qunyn tóleý, salyq, nesie máselelerin kóterdi. Bank júiesinde 20 myń zańdy tulǵanyń nesiesi bar. 14-15 myńǵa jýyq kásipker nesieni keiinge qaldyrýǵa ótinim berip, 86 paiyzynyń ótinishi maquldandy. Alǵashqy aptalarda túsinistik tanytpady degen shaǵymdar boldy. Biraq, keiinirek bári jolǵa qoiyldy. Mundaǵy basty másele - suranys daǵdarysy. Bul barlyq bizneske qatysty. Suranystyń qanshalyqty tómendegenin baǵalaý óte mańyzdy bolyp otyr», - dedi spiker.
Onyń aitýynsha, memleket tarapynan óte jyldam kómek kórsetildi.
«Memleket qoldaý kórsetý boiynsha birden iske kiristi. Ekonomikaǵa biraz kedergi bolsa da, indettiń aldyn alýda shapshań qimyldady. Munyń barlyǵy aqtaldy, óitkeni halyqtyń qaýipsizdigi bárinen mańyzdy. Salyq boiynsha jeńildikter birden qarastyryldy. Shaǵyn jáne orta biznestiń artyq qarajaty joq edi. Árine, eń aldymen solarǵa kómek qajet boldy», - dedi A. Myrzahmetov.
