Elordada karantin aimaǵyna zańsyz ótip ketpek bolǵan «Mercedes Benz Gelandewagen» kóligi Nura ózenniń ortasynda turyp qalǵan. Qalalyq departamenttiń izdeý-jedel toby kólikti taýyp, sýdan alyp shyqty, - dep habarlaidy qalalyq politsiia departamentiniń baspasóz qyzmeti.
Nur-Sultan qalasynda engizilgen tótenshe jaǵdai kezinde karantin aimaǵyna zańsyz ótkenderdi anyqtaý jáne ustaý maqsatynda qalalyq politsiia departamentiniń tártip saqshylary jáne «Astananyń kólik klýbtary aliansy» qozǵalysynyń eriktilerinen qurylǵan mobildik jedel-izdeý toptary quryldy.
6 sáýir kúni saǵat 11:00 shamasynda jedel top Tselinograd aýdanynyń Qosshy jáne Taitóbe aýyldarynyń arasynda Nur-Sultan qalasynyń karantindik aimaǵyna Nura ózenin kesip ótpek bolǵan «Mercedes Benz Gelandewagen» kóligin anyqtady.
Alaida, bóget shliýzy ashylǵandyqtan ózendegi sý deńgeii bir jarym metrge kóterilip, kólik sýdan óte almai qalǵan.
Politseiler men eriktiler bolat arqanǵa jalǵap, kólikti sýdan súiretip alyp shyqty.
Karantin rejimin buzǵan er adam ózenge balyq aýlaýǵa kelip, osyndai jaǵdaiǵa urynǵanyn aityp aqtalǵan.
«Mercedes Benz Gelandewagen» markaly kóliktiń júrgizýshisine qatysty QR Ákimshilik quqyq buzýshylyq kodeksiniń 476-baby («tótenshe jaǵdai rejimin buzý») boiynsha hattama toltyryldy, Atalmysh bapta 10 AEK kóleminde aiyppul tóleý nemese 15 táýlikke deiin qamaýǵa alý qarastyrylǵan.
Politsiia departamenti kún jylynýyna bailanysty ózende sý deńgeii kóterilip, keibir kópirge shyǵar tusty jáne joldardy sý basyp qalǵanyn eske salady. Nur-Sultan qalasynyń turǵyndaryna asa saqtyq tanytyp, qajettilik týyndamasa, úiden shyqpaýǵa keńes berildi.
