QR Ishki ister ministri Erlan Turǵymbaev Nur-Sultan men Almaty qalalaryna kirip-shyǵý tártibin túsindirdi, dep habarlaidy "Ult aqparat".
«Densaýlyq saqtaý organdary men Qorǵanys ministrligi blokposttar arqyly Nur-Sultan men Almaty qalalarynyń perimetri boiynsha kólik quraldarynyń kirýi men shyǵýyn jáne azamattardyń qozǵalysyn shekteidi. Qalaǵa Nur-Sultan men Almatyda tiisti tirkeýde turǵan adamdar jáne qalalardyń ómirlik qyzmetterin qamtamasyz etýge qajet adamdar ǵana kiredi. Tizimdi ákimdikter anyqtaidy», - dedi ministr «Habar 24» telearnasyndaǵy Úndeýde.
Onyń aitýynsha, bul tyiym tutyný taýarlaryn jetkizetin kólikterge júrmeidi.
Sondai-aq, ministr jalǵan aqparat taratqandarǵa jaýapkershilik júkteletinin eskertti jáne azamattardan karantin kezinde túsinistik tanytýǵa shaqyrdy.
Eske salsaq, 19 naýryzdan bastap Nur-Sultan jáne Almaty qalalarynda karantin rejimi engiziledi.
Sondai-aq QR Premer-Ministri baspasóz qyzmetiniń aqparatyna sáikes, 19 naýryz kúni saǵat 00.00-den bastap engiziletin Nur-Sultan jáne Almaty qalalarynyń aýmaǵyna adamdardyń kirýin/shyǵýyn shekteý kelesi sanattaǵy tulǵalar úshin qoldanylmaidy:
- buǵan deiin qaladan shyǵyp ketken Nur-Sultan jáne Almaty qalalarynyń turǵyndary qalaǵa oralǵan jaǵdaida;
- buǵan deiin qalaǵa kirgen basqa óńirlerdiń turǵyndary qaladan shyǵatyn bolsa;
- buǵan deiin shetelderge shyǵyp ketken QR azamattary (olar Qazaqstan Respýblikasyna oralǵan jaǵdaida);
- buǵan deiin elden shyǵý úshin QR aýmaǵyna kirgen jáne elden shyǵyp ketý maqsatynda áýe kóligimen shyǵatyn sheteldikterge;
- sheteldikter (azamattyǵy joq tulǵalar), Qazaqstan Respýblikasynda turýǵa yqtiiarhaty bar tulǵalarǵa;
- buǵan deiin shetel memleketiniń aýmaǵyna shyǵyp ketken QR azamattary Qazaqstan Respýblikasyna oralǵan jaǵdaida;
- emdelý úshin shetelge shyǵatyn QR azamattaryna, olardyń densaýlyq saqtaý mekemeleriniń rastaýshy qujattary bolǵan jaǵdaida;
- eldiń jáne shetel memleketteriniń diplomatiialyq qyzmetiniń personaly jáne olardyń otbasy múshelerine, sondai-aq Qazaqstanǵa QR Syrtqy ister ministrliginiń shaqyrýy boiynsha baǵyt alǵan shetel memleketteriniń jáne halyqaralyq uiymdardyń delegatsiia múshelerine;
- poiyz jáne lokomativ brigadalarynyń múshelerine, sondai-aq temirjol tasymaly protsesine qatysatyn tulǵalarǵa, áýe, teńiz kólikteriniń ekipajyna, halyqaralyq júk tasymalyn júzege asyratyn júk avtokóligi quraldarynyń júrgizýshilerine;
- Qazaqstan Respýblikasy azamattarynyń otbasy músheleri bolyp sanalatyn sheteldikterge (týystyq bailanys faktisi - eri (zaiyby), olardyń ata-analary men balalary ekeni rastalǵan jaǵdaida);
- Nur-Sultan jáne Almaty qalalarynda jumys isteitin, qalamańy aýmaqtarynda turatyn turǵyndarǵa;
- áýe jáne temirjol tranziti qatynasymen júrgen Qazaqstan Respýblikasynyń azamattaryna;
- basqa da erekshe jaǵdailarda, mundai jaǵdailar COVID-19-ben kúresý jónindegi qalalyq shtabtarda derbes tártipte qaralady.
