Ishki ister ministri Erlan Turǵymbaev karantin kezinde elde turmystyq qylmystyń sany artqanyn málimdedi, dep habarlaidy QazAqparat.
«Qazaqstanda qylmys sany 37 paiyzǵa tómendedi. Aýyr qylmystardyń ishinde densaýlyqqa ziian keltirý qylmystary - 12 paiyz, zorlyq - 39 paiyz, qaraqshylyq - 52 paiyz, tonaý - 50 paiyz, al buzaqylyq faktileri - 45 paiyzǵa tómendedi. Jasóspirimder arasyndaǵy qylmys ta qysqardy. Kóshede jasalatyn qylmys - 51 paiyzǵa, mas kúide jasalatyn qylmys - 16 paiyzǵa azaiyp otyr. Qylmysty ashý kórsetkishi jaqsardy. Aýyr qylmystardyń - 64 paiyzy, asa aýyr qylmystardyń - 94 paiyzy ashyldy», - dedi Erlan Turǵymbaev Memleket basshysynyń Qazaqstan halqyna joldaýynda aitylǵan tapsyrmalaryn iske asyrý barysy týraly ótken baspasóz máslihatynda.
Ministrdiń aitýynsha, karantin kezinde úide otyryp, alkogoldik ishimdik ishý faktileri kóbeigen. Osynyń saldarynan turmystyq qylmystyń sany ósip, ishimdik áserinen adam óltirý faktileri - 12 paiyzǵa, jasóspirimderge qatysty zorlyq faktileri - 19 paiyzǵa artqan.
«Mundai jaǵdaida jábirlenýshiniń jaqyn tanysy men týystarynyń osyndai qylmystardy jasaǵany anyqtalyp otyr. Olar - ákesi, ógei ákesi, kórshisi nemese tanystary. Mundai jaǵdai - otbasy úshin úlken tragediia. Jaǵdaidy durystaý úshin aldyn alý sharalary kúsheitilip, esepte turǵan azamattarmen jumys júrgizildi», - dedi ol.
