Biyl jyl basynan beri elimizdegi sý aidyndarynda 38 adam sýǵa ketti, onyń ishinde 13-i kámelet jasyna tolmaǵandar, dep habarlaidy "Ult aqparat" Tótenshe jaǵdailar komitetiniń baspasóz qyzmetine silteme jasap.
Elimizdegi karantinge qaramastan, belgilenbegen jerde sýǵa shomylǵan 4 adam sýǵa ketip qaza tapqan. Qaiǵyly oqiǵa Nur-Sultan, Pavlodar qalalarynda, Aqmola jáne Túrkistan oblystarynda tirkelgen.
Sondai-aq, jyl basynan beri Almaty – 6 adam, Qaraǵandy jáne Túrkistan oblystarynda 4 adamnan qaza tapty.
Sý aidyndaryndaǵy qaiǵyly oqiǵanyń basty sebepteri: balyq aýlaý erejesin saqtamaý (22 adam, onyń ishinde 5 adam muz astyna túsip ketti); muz jarylyp sýǵa ketý (6 adam, onyń ishinde 6 bala oiyn kezinde), qaraýsyz júrgen balalardyń sýǵa qulaýy (6 bala); kúshin jete baǵalamaý, sý burǵyshqa shomylý, qatty aǵys, aiaq-qol sińiriniń tartylyp qalýy (3 adam, onyń ishinde 1 bala); mas kúiinde sýǵa shomylý (1 adam).
Elimizde 111 qalalyq jáne 481 jeke jaǵajai, sonymen qatar sý aidyndaryna jaqyn ornalasqan 70 balalar lageri anyqtaldy.
«Elimizdiń sý aidyndaryndaǵy oqiǵa sanyn azaitý maqsatynda qutqarýshylar aldyn alý jumysyn júrgizýde. Shomylý maýsymy kezinde1 myńnan astam qutqarýshy qyzmet atqarýdyń kúsheitilgen túrine aýystyryldy. 300-den astam qaiyq pen 1 myńǵa jýyq qutqarý quraly daiyndaldy.
Qutqarý bólimshelerinde sýdaǵy resmi demalys oryndaryn qamtýdy arttyrý úshin qosymsha 85 qutqarýshy jasaqshy oqytylady», delingen habarlamada.
Sondai-aq, jedel-qutqarý jasaqtary jabdyqtalmaǵan ýchaskeler men tabiǵi jaǵajailarǵa 55 maýsymdyq mobildi qutqarý beketti qoiylady dep kózdelip otyr.
