LGBT resmi qaýymdastyq bolǵanmen, oǵan jasóspirimderdi tartýǵa quqylary joq. Bul týraly Ortalyq kommýnikatsiialar ortalyǵynda «Ózińdi jáne jaqyndaryńyzdy býlling jáne kiberbýllingten qalai qorǵaýǵa bolady» taqyrybynda ótken brifingte aityldy, dep habarlaidy QazAqparat.
«Biz 2011 jyly ár internet qoldanýshy anonimdi túrde habarlama jaza alatyn veb-sait ashtyq. Onda habarlamalardy oqyǵannan keiin tiisti shara qoldanamyz. Kiberbýlling degendi 2011 jyldan beri bilemiz», - deidi «Qazaqstannyń internet qaýymdastyǵy» ZTB prezidenti Shavkat Sabirov.
Onyń aitýynsha, atalǵan veb-saitqa 2011-2019 jyl aralyǵynda 19045 habarlama kelgen.
«Osynshama habarlama nátijesinde saraptama, qorytyndy jasaýǵa bolady. Koronavirýs indeti, karantin jaǵdaiynda elimizdegi barlyq turǵyn, sonyń ishinde jasóspirimdermen qosa onlain jelide otyrdy. Áleýmettik jeli áńgimelesý quraly ǵana emes, ol adamǵa qaýip tóndirýi de múmkin. Mysaly, alaiaqtyq, kiberbýling», - deidi ol.
Shavkat Sabirovtyń aitýynsha, koronavirýs indeti órship turǵan kezde ata-analar tarapynan kóptegen aryz-shaǵym túsken.
«Bastapqyda balalar áleýmettik jeli arqyly bir-birimen ázildesse, ary qarai ol bir-birin yzalandyrýǵa ulasady. Eń sońynda ekran artynda otyrǵan adam qylmysker bolyp shyqsa, ol balany bopsalaýǵa kirisedi. Karantin kezinde elimizdegi jasóspirimder LGBT qaýymdastyǵyna kire bastaǵanyn baiqadyq. LGBT resmi qaýymdastyq bolǵanmen, oǵan jasóspirimderdi tartýǵa quqylary joq. Biz quqyq qorǵaý organdarymen jumys istegisi kelmeitin ata-analarǵa da kómek kórsetemiz. Jobada tek qoǵam belsendileri ǵana jumys isteidi. Memleket qoǵam belsendilerine teris qaramaýy kerek, sebebi mundai úlken máseleni qoǵam belsendileri óz kúshterimen ǵana sheshe almaidy», - deidi ol.
