Almatyda Óńirlik kommýnikatsiialar qyzmeti alańynda qalalyq taýarlar men qyzmetterdiń sapasy men qaýipsizdigin qadaǵalaý departamenti basshysynyń orynbasary Ásel Halyqova karantin rejiminiń talaptaryn naqtylady, dep habarlaidy QazAqparat.
«Almaty shekarasynyń perimetri boiynsha ornalasqan blok posttarda sanitarlyq epidemiologiialyq qyzmettiń mamandary da jumys isteitin bolady. Olardyń mindeti - naýqas adamdardy taýyp, oqshaýlaý. Ol úshin arnaiy teplovizor quraldar paidalanylady. Teplovizorlardyń sany búginde jetkilikti. Qalaǵa kiretin kóliktegi jolaýshylardyń qyzýy kóterilip turǵan bolsa, kirýine tyiym salynady», - dedi Ásel Halyqova.
Aita ketý kerek, Almaty men Nur-Sultan qalalarynda karantin rejimi engizildi. Almatyda azamattar men avtokólikterdiń qalaǵa kirip shyǵyn shekteý úshin 27 blok post ornatylady.
Almaty ákimi Baqytjan Saǵyntaevtyń aitýynsha, karantin qala turǵyndarynyń qaýipsizdigi úshin jasalyp otyr.
«Tótenshe jaǵdai kezinde barlyǵymyz birigýimiz kerek. Bul jaǵdaida ár azamattyń tártibi men oi-sanasy óte mańyzdy. Mundai qiyndyqtan bizdi tek birligimiz ben bir-birimizge qoldaýymyz, tártip saqtaý arqyly ǵana shyǵa alamyz. Biz qiyndyqty jeńemiz», - dedi ol.
