16 mamyr kúni «Astana Operanyń» Kameralyq zalynda «Qarańǵyda shyrqalatyn mýzyka» atty biregei qaiyrymdylyq joba ótedi. Kontserttiń qyzyqty mýzykalyq-poeziialyq baǵdarlamasy tas qarańǵyda ótetin bolady.
«Qarańǵyda shyrqalatyn mýzyka» qaiyrymdylyq jobasy múmkindigi shekteýli jastardyń máselelerine kóńil bólý maqsatymen uiymdastyryldy. Kontsertten túsken qarajattar «Svet v temnote» korporativtik qoryna aýdarylady.
Eshbir jaryqsyz, qarańǵyda oryndalatyn klassikalyq mýzyka jaýharlary, sonymen qatar zamanaýi kompozitorlar shyǵarmashylyǵynyń úzdik úlgileri ónerdi qabyldaýdan tańǵajaiyp áser syilaidy. Zaldaǵy otyrǵan árbir jan mýzykany estip qana qoimai, ony sezine de alady. Qiialdaý men elestetý syrtqy orta men ishki jan-dúnieńe jańasha úńilýge yqpal etedi.
Kontsertke zaǵip kásibi ánshiler men mýzykanttar Rýslan Bashaev pen Azamat Temirbaev qatysady. Kameralyq zal sahnasynda kontrtenor Batyrjan Smaqov, sondai-aq «Astana Opera» Simfoniialyq orkestriniń sheber mýzykanttary Zynhar Ahmetbek (skripka), Raqymjan Baspaev (violonchel), Mahambet Jarǵaqov (kontrabas), Aleksandr Taraskin (fleita), Konstantin Strigin (baian), Janar Seiithanova (fortepiano) óner kórsetedi. Sonymen birge fortepiano partiiasyn Raýshan Beskempirova oryndaidy.
Klassik kompozitorlardyń vokaldyq ári aspaptyq týyndylary, atap aitqanda F.Shýberttiń «Keshki serenada», K.Debiýssidiń «Sirinks», F.Shopenniń Vals sis-moll (do diez minor), op. 64, №2 jáne t.b. shyǵarmalar oryndalady.
Baǵdarlamaǵa qazaqstandyq jáne sheteldik avtorlardyń barshaǵa súiikti ánderi endi – Q.Shildebaevtyń «Otan Ana», M.Magomaevtyń «Siniaia vechnost», K.Fransýa men J.Revonyń «My Way», D.Ellingtonnyń «Don’t Get Around Much Anymore», «Vremia svinga» kinofilminen Dj.Kernnyń «The Way You Look Tonight» ánderi bar.
Tyńdarman qaýym halyq aspaby – qobyzdyń sarynyn estip, Yqylas Dúkenulynyń «Aqqý», «Erden» kúilerintyńdai alady.
Baǵdarlamada oqylatyn óleń joldary keshtiń pozeiialyq arqaýy bolmaq. Bastalýy saǵat 19:00-de.
