Áleýmettik jelide Taldyqorǵandaǵy tártipsizdiktiń beinehronikasy paida boldy, dep habarlaidy QazAqparat.
Videonyń basyndaǵy kadrlarda «5 qańtar kúni saǵat 10.00-de Taldyqorǵan qalasy politsiia basqarmasy ǵimaratynyń aldyna 200-ge jýyq adam ákimshilik qamaýǵa alynǵandardy bosatý talabymen jinaldy» degen jazý bar.
Odan keiingi kadrda bul saǵat 14.30-daǵy oqiǵalar ekeni aitylady. «Taldyqorǵan qalasy politsiia basqarmasy ǵimaratynan sherýshilerdi yǵystyrý» dep jazylǵan.
Videodan oqiǵanyń birtindep ýshyqqanyn kórýge bolady. Kadr betindegi jazý ártúrli ýaqytta shamamen 3000 sherýshiniń politsiia qyzmetkerlerine shabýyldaǵanyn aitady.
Odan keiingi kadrlarda Almaty oblystyq ákimdigine jasalǵan shabýyl kórsetilgen.
Kelesi kadrda qalyń toptyń ákimdik ǵimaratyna, áskeri jáne politsiia qyzmetkerlerine shabýyl jasap jatqany kórsetiledi.
Taǵy bir sátte Almaty oblysy ákiminiń orynbasaryn birneshe adamnyń oqiǵa ortasynan qorǵashtap, shyǵaryp bara jatqanyn kórýge bolady.
Politsiia kólikterin tóńkerý, qiratý kadrlary alańdaǵy Nursultan Nazarbaev eskertkishin qulatqan sátke ulasady.
Odan keiingi kadrdyń betindegi jazý «5 qańtar, saǵat 17.40» dep berilgen. Bul kezde Ulttyq qaýipsizdik komiteti depatamenti ǵimaratyna shabýyl jasalǵany aitylady.
«5 qańtar saǵat 19.48» dep tańbalanǵan kadrda Almaty oblysy politsiia departamentine shabýyl jasalǵan sátter kórsetilgen.
«7 qańtar saǵat 11.37» dep belgilengen kadrǵa tergeý izoliatoryna qalai shabýyl jasalǵany túsip qalǵan.
Videodan shep quryp alǵan birneshe belgisiz adamnyń ǵimaratqa oq jaýdyryp jatqany, jaralanǵan jaqtastaryn qutqarmaq bolǵan áreketteri kórinedi.
