Májilis depýtaty Berik Dúisenbinov tergeý izoliatorynda otyrǵan balalar týraly aitty, dep habarlaidy Sputnik Qazaqstan.
"Búginde ustalǵandardyń keibireýleri jalpy toptyń tolqynyna ilesip, zańsyz áreketter jasaǵanyn moiyndap ta otyr. Olardyń kópshiligi ózderiniń basqa maqsatta paidalanylǵanyn túsinip ókinýde. Aýyr qylmystar men kisi óltirýler bastalǵan kezde alańdaǵy topty tastap qaityp ketpek bolǵany, alaida, belgisiz bireýler qarýmen qorqytyp, olardy tártipsizdik pen tonaýǵa májbúrlep, kópshilik arasynan shyǵýǵa múmkindik bermegen jaittar da bar", - dedi Dúisenbinov májilistiń jalpy otyrysynda.
Osy oraida depýtat beibit turǵyndardy ǵimarattardy qiratqan buzaqylar men kisi óltirgen qanisherlerden ajyratý qajettigin taǵy bir márte eske saldy. Prezident Qasym-Jomart Toqaev ta aýyrlatatyn mán-jailar bolmaǵan jaǵdaida jazany jeńildetýge bolatynyn jazǵan.
"Adamdardy óltirýge jáne ǵimarattardy talqandaýǵa qatysy joq ustalǵandar boiynsha qajet bolǵan jaǵdaida eshqaida ketpeý týraly qolhat alyp, ýaqytsha ustaý izoliatorynan bosatý kerek dep sanaimyz. Usaq zańbuzýshylyqqa jol bergender qylmystyq isterdi toqtatyp, ata-analarynyń jaýapkershiligimen úiine jiberilgeni jón. Sondai-aq, tergeý izoliatorynda jaqynda ǵana balalar úiinen shyqqan, izdeýshisi joq birneshe jas bala bar. Olar úshin jazasyn aýyrlatatyn jaǵdai bolmasa, óz atymnan, bosatýdy talap etemin", - dep atap kórsetti Dúisenbinov.
Budan bólek, depýtattar qamaýda otyrǵandardy azaptaý men uryp-soǵýdan qorǵap, jaraqat alǵandarǵa nemese basqa muqtajdarǵa meditsinalyq kómek kórsetýdi talap etti. Tergeý kezinde qorǵaýshylar mindetti túrde bolýy qajet.
"Bul jumysty uiymdastyrý úshin májilis pen senat depýtattarynyń arasynan jedel túrde parlamenttik komissiia quryp, olardy tez arada qamaýda otyrǵan Almaty, Taraz, Shymkent, Qyzylorda, Taldyqorǵan, Atyraý, Aqtobe qalalarynyń tergeý izoliatorlaryna jiberýdi usynamyz", - dedi Dúisenbinov.
