Qańtar kúnderi qazaq eli óziniń memlekettiginen, táýelsizdiginen airylyp qala jazdady. Bul týraly Májilis depýtaty Aidos Sarym aitty, dep habarlaidy QazAqparat.
«Qaraly qańtar oqiǵalary biz úshin úlken sabaq boldy. Ainaldyrǵan úsh-tórt kún sanamyzdy dúr silkindirip, qarapaiym qaǵidalar men máńgilik qundylyqtardyń da álsiz, qorǵansyz ekenin kórsetti. Tańerteń erte turyp, úiińe dúkennen nan-sút alyp, aiańdap jumysqa baryp-kelýdiń ózi zor baqyt ekenin túsindirdi. Úirenshikti, máńgi dep sanalǵan ómirlik, turmystyq qubylystar kóz aldynda ǵaiyp bolýy ǵajap emes ekenin uqtyrdy. Pandemiiaǵa deiin «densaýlyq – zor bailyq» deitin sózder kópshilik úshin toidaǵy jattandy sózder bolyp kórinse, qazir olardyń da qadirine jete bastaǵandai edik. Qańtar tragediiasy kópshilikti mezi qylǵan «aspanymyz ashyq bolǵai», «elimiz aman bolsyn», «tynyshtyq», «turaqtylyq» degen uǵymdardyń qýaty men qajettiligin anyqtap berdi. Shynyn aitaiyqshy, qańtar kúnderi qazaq eli óziniń memlekettiginen, táýelsizdiginen airylyp qala jazdady. Osy tragediiany josparlaǵan, memleketti tóńkergisi kelgenderdiń dittegen sasyq maqsaty men pasyq oilary iske asqan bolsa, elimizde keibir patriottardyń túsine kirmegen antiýtopiia bolar edi», - dedi ol Májilistiń jalpy otyrysynda.
Depýtat memleketti qurýǵa, nyǵaitýǵa ondaǵan, júzdegen jyldar kerek bolsa, ony oirandaý úshin bir aptanyń, bir aidyń ózi jetkilikti ekenin kózimizben kórgenimizge nazar aýdartty.
«Kóp jaǵdaida bizdiń jurt kinálini, jaýaptyny tez-aq taba salady. Óz ómiriniń ózegine ózinen ózgeni kináli etý halqymyzdyń jaman qasietine ainalyp bara jatyr, ókinishke qarai. Men bolsam, dál qazir, búgin dál osy minberden barlyǵymyzdy tereń oilanýǵa, túsinýge, túisinýge shaqyrǵym kelip otyr. Meniń aityp otyrǵanym – tarihi, urpaq retindegi jaýapkershilik pen memleketshildik sana. Moiyndaiyqshy, qaraly qańtar kúnderi kópshiligimiz missiiamyz, mindetimiz, mansabymyz talap etken jaýapkershilkti kórsete bilmedik! Jaǵynaiyn dep aityp otyrǵanym joq, shyndyq bireý - prezidentimiz, Memleket basshysy Qasym-Jomart Toqaev der kezinde tiisti tarihi sheshimderdi qabyldamaǵanda «qaitse de astanada qalamyn, elmen birge bolamyn» dep tabandylyq tanytpaǵanda, bizder búgin myna jiyndy ótkizip otyrmas edik. Shynyn aitaiyq, bundai tarihi sheshimdi prezident Toqaev jeke-dara qabyldady. Eń bastysy – sol úshin orasan zor jaýapkershilikti de moinyna jeke-dara artty», - dedi Aidos Sarym.
