قاڭتار كٷندەرٸ قازاق ەلٸ ٶزٸنٸڭ مەملەكەتتٸگٸنەن, تەۋەلسٸزدٸگٸنەن ايرىلىپ قالا جازدادى. بۇل تۋرالى مەجٸلٸس دەپۋتاتى ايدوس سارىم ايتتى, دەپ حابارلايدى قازاقپارات.
«قارالى قاڭتار وقيعالارى بٸز ٷشٸن ٷلكەن ساباق بولدى. اينالدىرعان ٷش-تٶرت كٷن سانامىزدى دٷر سٸلكٸندٸرٸپ, قاراپايىم قاعيدالار مەن مەڭگٸلٸك قۇندىلىقتاردىڭ دا ەلسٸز, قورعانسىز ەكەنٸن كٶرسەتتٸ. تاڭەرتەڭ ەرتە تۇرىپ, ٷيٸڭە دٷكەننەن نان-سٷت الىپ, اياڭداپ جۇمىسقا بارىپ-كەلۋدٸڭ ٶزٸ زور باقىت ەكەنٸن تٷسٸندٸردٸ. ٷيرەنشٸكتٸ, مەڭگٸ دەپ سانالعان ٶمٸرلٸك, تۇرمىستىق قۇبىلىستار كٶز الدىندا عايىپ بولۋى عاجاپ ەمەس ەكەنٸن ۇقتىردى. پاندەميياعا دەيٸن «دەنساۋلىق – زور بايلىق» دەيتٸن سٶزدەر كٶپشٸلٸك ٷشٸن تويداعى جاتتاندى سٶزدەر بولىپ كٶرٸنسە, قازٸر ولاردىڭ دا قادٸرٸنە جەتە باستاعانداي ەدٸك. قاڭتار تراگەديياسى كٶپشٸلٸكتٸ مەزٸ قىلعان «اسپانىمىز اشىق بولعاي», «ەلٸمٸز امان بولسىن», «تىنىشتىق», «تۇراقتىلىق» دەگەن ۇعىمداردىڭ قۋاتى مەن قاجەتتٸلٸگٸن انىقتاپ بەردٸ. شىنىن ايتايىقشى, قاڭتار كٷندەرٸ قازاق ەلٸ ٶزٸنٸڭ مەملەكەتتٸگٸنەن, تەۋەلسٸزدٸگٸنەن ايرىلىپ قالا جازدادى. وسى تراگەدييانى جوسپارلاعان, مەملەكەتتٸ تٶڭكەرگٸسٸ كەلگەندەردٸڭ دٸتتەگەن ساسىق ماقساتى مەن پاسىق ويلارى ٸسكە اسقان بولسا, ەلٸمٸزدە كەيبٸر پاتريوتتاردىڭ تٷسٸنە كٸرمەگەن انتيۋتوپييا بولار ەدٸ», - دەدٸ ول مەجٸلٸستٸڭ جالپى وتىرىسىندا.
دەپۋتات مەملەكەتتٸ قۇرۋعا, نىعايتۋعا ونداعان, جٷزدەگەن جىلدار كەرەك بولسا, ونى ويرانداۋ ٷشٸن بٸر اپتانىڭ, بٸر ايدىڭ ٶزٸ جەتكٸلٸكتٸ ەكەنٸن كٶزٸمٸزبەن كٶرگەنٸمٸزگە نازار اۋدارتتى.
«كٶپ جاعدايدا بٸزدٸڭ جۇرت كٸنەلٸنٸ, جاۋاپتىنى تەز-اق تابا سالادى. ٶز ٶمٸرٸنٸڭ ٶزەگٸنە ٶزٸنەن ٶزگەنٸ كٸنەلٸ ەتۋ حالقىمىزدىڭ جامان قاسيەتٸنە اينالىپ بارا جاتىر, ٶكٸنٸشكە قاراي. مەن بولسام, دەل قازٸر, بٷگٸن دەل وسى مٸنبەردەن بارلىعىمىزدى تەرەڭ ويلانۋعا, تٷسٸنۋگە, تٷيسٸنۋگە شاقىرعىم كەلٸپ وتىر. مەنٸڭ ايتىپ وتىرعانىم – تاريحي, ۇرپاق رەتٸندەگٸ جاۋاپكەرشٸلٸك پەن مەملەكەتشٸلدٸك سانا. مويىندايىقشى, قارالى قاڭتار كٷندەرٸ كٶپشٸلٸگٸمٸز ميسسييامىز, مٸندەتٸمٸز, مانسابىمىز تالاپ ەتكەن جاۋاپكەرشٸلكتٸ كٶرسەتە بٸلمەدٸك! جاعىنايىن دەپ ايتىپ وتىرعانىم جوق, شىندىق بٸرەۋ - پرەزيدەنتٸمٸز, مەملەكەت باسشىسى قاسىم-جومارت توقاەۆ دەر كەزٸندە تيٸستٸ تاريحي شەشٸمدەردٸ قابىلداماعاندا «قايتسە دە استانادا قالامىن, ەلمەن بٸرگە بولامىن» دەپ تاباندىلىق تانىتپاعاندا, بٸزدەر بٷگٸن مىنا جيىندى ٶتكٸزٸپ وتىرماس ەدٸك. شىنىن ايتايىق, بۇنداي تاريحي شەشٸمدٸ پرەزيدەنت توقاەۆ جەكە-دارا قابىلدادى. ەڭ باستىسى – سول ٷشٸن وراسان زور جاۋاپكەرشٸلٸكتٸ دە موينىنا جەكە-دارا ارتتى», - دەدٸ ايدوس سارىم.
