Elimizdiń Adam quqyqtary ulttyq ortalyǵyna 39 shaǵym tústi. Bul týraly QR Adam quqyqtary jónindegi ýákili Elvira Ázimova aitty, dep habarlaidy QazAqparat.
«Qańtardyń 13-24 kúnderi aralyǵynda óńirlik toptar Qazaqstannyń 16 óńirindegi 81 tergeý, ýaqytsha ustaý, qabyldaý-taratý jáne arnaýly qabyldaý ornynda boldy. Azamattardan quqyǵynyń buzylǵany týraly 39 shaǵym tústi. Onyń ishinde 20-sy - zorlyq-zombylyq tanytý jáne qatigezdik kórsetýge qatysty jazbasha shaǵym», - dedi Elvira Ázimova Eýropalyq odaq elderiniń adam quqyqtary jónindegi 10 Elshisimen onlain kezdeý barysynda.
Onyń atap ótýinshe, qalǵan shaǵymdar negizsiz ustaýǵa, ákimshilik jazaǵa tartý týraly sot sheshimimen kelispeýge, meditsinalyq kómek kórsetpeýge, advokattardy jibermeýge qatysty boldy.
«Degenmen, áleýmettik jelilerde quqyq buzýshylyqqa qatysty qońyraýlar men habarlamalardyń sany birshama kóp. Keshe Bas prokýratýra prokýratýra organdaryna quqyq qorǵaý organdary tarapynan tergeý júrgizý barysynda tyiym salynǵan ádister men azamattar quqyǵynyń buzylýyna qatysty 109 shaǵym túskenin jariialady. Tekserý nátijesinde 21 qylmystyq is qozǵaldy. Onyń ishinde bireýin ǵana - arnaýly prokýror, al qalǵan 20-syn - jemqorlyqqa qarsy qyzmet tergep jatyr», - dedi ol.
