Básekelestikti qorǵaý jáne damytý agenttigi qaraqumyq óńdeýshilermen kezdesý ótkizdi, - dep habarlaidy "Ult aqparat".
Qaraqumyq ta elimizde áleýmettik mańyzy bar azyq-túlik tizimine kiredi. Óitkeni ónim áskerdiń, aýrýhanalar men balabaqshalardyń, mektepterdiń mindetti ratsionyna kiredi. Ózge azyq-túlikpen birge onyń da baǵasy sharyqtap barady. Óńdeýshilerdiń aitýynsha, munyń negizgi sebebi – egis alqaptarynyń azdyǵy jáne jasandy tapshylyq.
Kezdesýde Pavlodar oblysynyń qaraqumyq óńdeý kásipornynyń direktory Dmitrii Tiýmenev biylǵy qaraqumyq tapshylyǵyn qýańshylyqpen bailanystyrady. Byltyr shyǵym jaqsy bolyp, qaraqumyq óńdeý baǵasy ketken shyǵyndy aqtamai sarsańǵa salsa, biyl kerisinshe shikizat jetispei jatyr.
«Kúzde óńdeýge jaramdy qaraqumyqtyń bir kelisin 140-150 teńge satyp alsaq, qazir 265 teńgege jetip otyr. Sonda óńdelgen jarmanyń kelisi 425 teńge bolady», - deidi kásipker.
Jaǵdai bulai kete berse, Qazaqstan naryǵyn Reseidiń qaraqumyǵymen toltyrýdan basqa amal qalmaityn túri bar.
«Eger Resei aýmaǵynan jeńildetilgen salyqpen tasymal bastamasaq, tapshylyq kúsheiýi múmkin. Kórshi eldiń shekaralas oblystarynda qaraqumyq qory jetip artylady. Ol óńirlerde qarqumyq alqaby orasan. Al Qazaqstanda az egiledi», - deidi Dmitrii Tiýmenev.
Qaraqumyq alqaby men oǵan degen suranystyń sáikesssizdigi Shyǵys Qazaqstanda da bar. Evgenii Kasatkin oblys naryǵyna ai saiyn 1000 tonna qaraqumyq qajet ekenin aitady. Al oblystaǵy óndirýshilerdiń áleýeti tek 700 tonna óńdeýge ǵana jetedi.
«Bizdiń oblysta 8 iri óńdeýshi kásiporyn bar Bizge táýligine 180 tonna qaraqumyq qajet. Iaǵni, barlyq óńdeýshi kásiporyndardy qamtamasyz etý úshin aiyna 5400 myń tonna shikizat kerek. Nelikten biz Resei siiaqty 5 maýsymnan 31 tamyzǵa deiin el ishinde shikizatty saqtaý úshin qaraqumyq eksportyna tyiym salǵan shekaralardy jappaimyz? Sonymen qatar, biyl Resei qaraqumyqtyń egis alqaptaryn 25%-ǵa arttyrdy. Olar 1,2 million tonna qaraqumyq jinaýdy josparlap otyr. Bul Qazaqstandaǵy qaraqumyq baǵasyn Reseidiń belgileýine jol ashady», - deidi sharýa.
Kezdesý qorytyndysy boiynsha qaraqumyq jarmasyn qaita óńdeýshiler baǵany turaqtandyrýdyń joldaryn usynýǵa kelisti.
«Básekelestikti qorǵaý jáne damytý agenttigi ol usynystardy Aýyl sharýashylyǵy ministrligimen birge talqylap, áleýmettik mańyzy bar taýarlardyń baǵasyn turaqtandyrý úshin júieli sharalar keshenin daiyndap, Memleket basshysynyń qaraýyna jiberedi», - dep jazylǵan agenttiktiń baspasóz qyzmeti taratqan málimette.
