Búgin Nurlan Ábdirovtiń tóraǵalyǵymen Qaraqat Jaqsylyqqyzy Abdendi Qazaqstan Respýblikasynyń Prezidenttigine kandidat retinde tirkeý máselesi boiynsha Ortalyq sailaý komissiiasynyń otyrysy ótti, dep habarlaidy "Ult aqparat" OSK baspasóz qyzmetine silteme jasap.
Kún tártibindegi másele boiynsha Ortsailaýkom múshesi Shavqat Ótemisov baiandama jasady. Ol 2022 jyldyń 8 qazanynda Ortalyq sailaý komissiiasyna «Kásibi áleýmettik qyzmetkerlerdiń ulttyq aliansy» respýblikalyq qoǵamdyq birlestigi Q.J. Abdendi Qazaqstan Respýblikasynyń Prezidenttigine kandidat etip usyný týraly qujattardy usynǵanyn habarlady. Ortalyq sailaý komissiiasyna kandidatty tirkeý úshin mynadai qujattar usynylǵan:
- Prezidenttikke kandidat Q.J. Abdenniń jáne onyń jubaiynyń aktivter men mindettemeler jóninde deklaratsiia tapsyrǵany týraly memlekettik kirister organynyń anyqtamasy;
- Prezidenttikke kandidat Q.J. Abdenniń ony tirkeýge kedergi keltiretin aýrýlardyń joqtyǵy týraly meditsinalyq qorytyndysy;
- oblystardyń, respýblikalyq mańyzy bar qalalardyń jáne Respýblika astanasynyń aýmaqtyq sailaý komissiialarynyń Prezidenttikke kandidat Q.J. Abdendi qoldap jinalǵan azamattardyń qoldaryn tekserý nátijeleri týraly hattamalary.
Osy hattamalarǵa sáikes, Prezidenttikke kandidat Qaraqat Jaqsylyqqyzy Abdenniń qoldaýyna Qazaqstannyń 15 óńirinen 121 314 azamattyń qoly jinalǵan. Tekserý nátijesinde 118 418-i ras dep tanyldy, iaǵni qajetti sany qamtamasyz etildi, bul - sailaýshylardyń jalpy sanynyń keminde 1%-y (118 273).
"Qaraqat Abdendi Prezidenttikke kandidat retinde tirkeýge qajetti barlyq qujattar Ortalyq sailaý komissiiasyna usynyldy jáne olarǵa qoiylatyn talaptarǵa tolyq sáikes keledi.
QR OSK qaýlysymen Qaraqat Jaqsylyqqyzy Abden 2022 jylǵy 20 qarashaǵa taǵaiyndalǵan Qazaqstan Respýblikasynyń Prezidentiniń kezekten tys sailaýynda Qazaqstan Respýblikasynyń Prezidenttigine kandidat bolyp tirkeldi, oǵan tiisti kýálik berildi" - delingen habarlamada.
