Qazaqstan múgedekter arbasyn ózi jasap shyǵarýy múmkin. Bul týraly eńbek jáne halyqty áleýmettik qorǵaý ministri Berdibek Saparbaev aitty, dep habarlaidy Sputnik Qazaqstan tilshisi.
Halyqqa esep berý kezdesýinde qaraǵandylyq turǵyn ministrge Qytaidan sapasyz arbalar jetkiziletinin aityp shaǵymdandy.
"Arbalar múmkindigi shekteýli azamattarǵa memlekettik satyp alý tásilimen alynyp berilip keledi. Biraq, olardyń sapasy óte nashar, Qytaidyń sapasyz, júrip-turýǵa yńǵaisyz arbalary alynady. Osy oraida meniń suraǵym: jaqyn arada qol arbalardyń sapasyn jaqsartý boiynsha jaǵdaijasala ma? Sapaly arbalardy óz elimizde jasaý múmkindigi qarastyrylǵan ba?", - dep surady ol.
Saparbaev ministrliktiń armany da, maqsaty da – otandyq múgedekter arbasyn shyǵarý ekenin atap ótti. Bul úshin tiisti jumystar qolǵa alynǵan kórinedi.
"Elimizde "Tynys" degen firma bar, qazir olar ministrliktiń tapsyrmasyna sáikes jasap jatyr. Sapasy qalai bolatynyn kóremiz, eger jaqsy bolsa, memlekettik tapsyrys berip, solarmen jumys isteimiz", - dedi ministr halyqqa esep berý kezdesýinde.
Sondai-aq, ol áleýmettik qyzmet kórsetý portalyn engizý jumysy júrgizilip jatqanyn aitty.
Ministrliktiń aqparatyna súiensek, bul portal múgedektigi bar azamattarǵa óz betinshe, memlekettik satyp alýsyz, óziniń jeke qajettilikterin eskere otyryp, kerekti tehnikalyq ońaltý quraldaryn jáne qyzmetterdi tańdaýǵa múmkindik beredi.
Aita ketsek, Qazaqstanda shamamen 680 myń múgedektigi bar adam turady, onyń ishinde 418 myńy (61,5%) – eńbekke jaramdy jasta, 87 myńy – 18 jasqa deiingi balalar (12,8%).
2018 jyly múgedekterdi áleýmettik qorǵaýǵa respýblikalyq biýdjetten 294,2 milliard teńge bólingen.
