Anastasiia Sheviakova
Qaraǵandynyń orman alqabynda óli kúiinde tabylǵan Anastasiia Sheviakovany óltirdi degen 26 jastaǵy áielge sot úkimi shyqty, - dep habarlaidy Tengrinews.kz.
Aiyptalýshyǵa qatysty qylmystyq is Qaraǵandy oblysynyń qylmystyq ister jónindegi mamandandyrylǵan aýdanaralyq sotynda qaraldy. Ol sýdia Qairat Qasimovtyń qaraýyna biyl shildede túsken.
Tergeýshilerdiń aitýynsha, sottalýshy Anastasiia Sheviakovany qyzǵanyshtan óltirgen.
Sot talqylaýy barysynda sottalýshynyń kinási tolyq dáleldengen. Jinalǵan dáleldemeler men sottalýshynyń moiyndaýyn eskere otyryp, ony 99-baptyń 2-bóliginiń 5-tarmaǵy "Asa qatygezdikpen jasalǵan kisi óltirý" boiynsha kináli dep tanydy.
"Sot sottalýshyny 15 jylǵa bas bostandyǵynan aiyrý jazasyn ortasha qaýipsizdiktegi túzeý mekemesinde óteý týraly úkim shyǵardy", - dep habarlady Qairat Qasymov úkimdi.
Marqumnyń týystary sot úkimine qanaǵattanǵan. Alaida olar máiitti sottalýshynyń jalǵyz ózi shyǵarǵanyna kúmán keltirdi.
"Oǵan bireý kómektesti dep oilaimyz. Biraq biz ony dáleldei almaimyz. Úkimge shaǵymdanbaimyz. Ol ádil jazasyn aldy dep esepteimiz. Anastasiianyń uly ákesiniń janynda, al qyzyna qamqorshylyq jasaldy", - dedi marqumnyń týystary.
Eske salaiyq, 27 naýryzda Qazybek bi aýdanyndaǵy orman alqabynda 5 naýryzda iz-túzsiz joǵalyp ketken 27 jastaǵy qaraǵandylyq Anastasiia Sheviakovanyń denesi tabylǵan bolatyn.
Ony óltirdi degen kúdikpen 26 jastaǵy qala turǵyny ustaldy. Ol janjal kezinde marqumdy pyshaqtap, qylmysyn jasyrý úshin máiitti orman beldeýine alyp ketkenin moiyndaǵan bolatyn.
