Búgin, iaǵni, 6 qańtar kúni Qaraǵandyda júzdegen adam kóshege jinalyp, jappai tóbeles kezinde mert bolǵan jigittiń qazasyna qatysty bilik oryndarynyń túsinikteme berýin talap etti.
Oblystyq bilim basqarmasynyń aldyna jinalǵan jurtshylyq óz talap-tilekterin aityp, qylmystyq isti tergeý barysyna alańdaýshylyq bildirdi. Keibir qoǵam belsendileri jiynnyń qalai óris alǵanyn feisbýk jelisi arqyly tikelei efirde kórsetti.
Qaraǵandy oblysy ákimdiginiń baspasóz qyzmetiniń habarlaýynsha, Qaraǵandydaǵy bilik ókilderi «Drevnii Rim» meiramhanasynda oryn alǵan janjal kezinde kóz jumǵan jigittiń jaqyndarymen kezdesken. Kezdesý barysynda tergeýdiń júrgizilýi jaily túsiniktemeler berilgen.
«Bul ýaqytta Politsiia departamentiniń aldynda aqparattyń habarlanýyn kútken 200-230 adam jinaldy. Jinalǵandardyń aldynda Qaraǵandy oblysynyń ákimi Erlan Qoshanov sóz sóilep, tergeýdiń barysy jaily jáne aldaǵy ýaqytta iske asyrylatyn sharalar týraly tolyq aqparat berdi. Ákim tergeý sharalarynyń QR Bas prokýrorynyń jeke baqylaýyna alynǵandyǵyn jáne barlyq kináli tulǵalardyń jazalanatynyn qadap aitty» deidi baspasóz ókilderi.
Bilik atalǵan protsesstiń obektivti jáne barynsha ashyq ótetinine ýáde berdi. Qazirgi ýaqytta quqyq qorǵaý organdary tarapynan QR Qylmystyq kodeksiniń adam óltirý jáne buzaqylyq baptary boiynsha qylmystyq is qozǵaldy. Búgingi tańda 8 qatysýshy anyqtaldy, onyń 7-eýi tutqynǵa alyndy, 1-eýi halyqaralyq izdestirýge jariialandy.
«Janjal eki kompaniia arasynda bolǵanyn jáne ultaralyq sipat almaǵanyn habarlaimyz. Sondai-aq QR Qylmystyq kodeksiniń 274-baby boiynsha jalǵan aqparat taratý - bes myń ailyq eseptik kórsetkishke deiingi mólsherde aiyppul salýǵa, 7 jylǵa deiinbas bostandyǵyn shekteýge ne sol merzimge bas bostandyǵynan aiyrýǵa jazalanatynyn eskertemiz. Kezdesý barysynda eshqandai zań buzýshylyqtar tirkelgen joq. Qazirgi ýaqytta qalada jáne oblysta jaǵdai turaqty, qoǵamdyq tártiptiń buzylýyna jol berilgen joq» delingen resmi habarlamada.
