Jańa jyl túni Qaraǵandyda adam óltirdi degen kúdikke ilingender arasynda Armeniia azamattary da bar. Bul týraly búgin ishki ister ministriniń birinshi orynbasary Janat Súleimenov málimdedi, dep habarlaidy Sputnik Qazaqstan tilshisi.
"Qazirgi tańda tergeý júrip jatyr. Barlyǵy Qazaqstan azamaty emes. Olardyń arasynda Armeniia azamattary da bar", — dedi Súleimenov.
Súleimenovtiń aitýynsha, qandy oqiǵa 31 jeltoqsannan 1 qańtarǵa qaraǵan túni tańǵy tórtter shamasynda Qaraǵandydaǵy "Drevnii Rim" meiramhanasynda boldy. Jappai tóbeleske meiramhanaǵa kelgender men meiramhana personaly qatysqan.
Personal túngi úshten keiin meiramhanany jaýyp, ishtegi qonaqtardy syrtqa shyǵaryp jibergen. Al olar, Súleimenovtiń aitýynsha, óz dostaryna habarlasqan. Saldarynan janjal týyp, jappai tóbeleske ulasqan.
Al qaza tapqan jigit meiramhanada demalǵan qonaqtardyń arasynda bolmaǵan, qońyraý shalǵannan keiin kelipti.
Politsiianyń málimetinshe, quqyq qorǵaý organdary oqiǵa ornyna 04:40-ta kelgen.
