Dárigerler Qaraǵandy oblysyndaǵy jantúrshigerlik jol apatynan zardap shekkenderdiń jaǵdaiy týraly aitty, - dep habarlaidy "Ult aqparat".
Olardyń sózinshe, oqiǵadan 18 adam zardap shekken.
«Jalpy, aýrýhanaǵa 18 naýqas tústi. Olardyń tórteýi aýyr jaǵdaida. Ahýal ortalyǵynyń jedel jumysynyń arqasynda naýqastar statsionarlarǵa bólindi. Turaqty dinamikasy bar eki patsient Ońtústik-Shyǵystaǵy bazaǵa (H. J. Maqajanov atyndaǵy kópsalaly aýrýhana) attandyryldy. Bizdiń aýrýhanada óte aýyr haldegi eki adam qaldy. Munda jergilikti statsionardyń jáne bizdiń hirýrgtardyń kúshimen operatsiialyq blok jaǵdaiynda shokqa qarsy reanimatsiialyq is-sharalar bastaldy. Hirýrgtar toby uiymdastyryldy, onyń quramyna meditsina ýniversitetiniń qyzmetkerleri, osy jerde jumys atqaratyn hirýrgtar kirdi. Ońtústik-Shyǵystan da hirýrgter tartyldy. Iaǵni jaq-bet hirýrgy, oftalmolog, neirohirýrg jáne ish hirýrgy. Qazirgi ýaqytta naýqastardyń jaǵdaiy aýyr. Qarqyndy terapiia júrgizilip jatyr», - deidi H. J. Maqajanov atyndaǵy kópbeiindi emhananyń travmatologiia ortalyǵynyń basshysy, MEAQ "QMÝ" hirýrgiialyq aýrýlar kafedrasynyń meńgerýshisi Berik Tóleýbaev.
Eske salaiyq, jol apaty 25 qarashada tańerteń saǵat 9:15 shamasynda bolǵan. Politsiia málimetinshe, avtobýstardyń biriniń júrgizýshisi oqiǵa ornynda qaza bolǵan. Zardap shekken jolaýshylar men ekinshi avtobýstyń júrgizýshisi meditsinalyq mekemege jetkizilgen.
