Qaraǵandy farmatsevtikalyq kesheninde (QFK) COVID-19 qarsy ázirlengen «Spýtnik V» vaktsinasy qatań baqylaýdan ótkiziledi. Mekemeniń bas direktory Sergei Baron osylai málim etti, dep habarlaidy QazAqparat.
QFK bazasynda vaktsina óndirý týraly sheshim QR Densaýlyq saqtaý ministrliginiń komissiiasy jáne Reseidiń Tikelei investitsiialar qorynyń (RTIQ) qazaqstandyq farmatsevtikalyq kásiporyndarǵa sapary jáne inspektsiialary nátijesinde qabyldandy. Sarapshylardyń derekteri boiynsha QFK reseilik sýbstantsiiadan daiyn nysandy óndirýge anaǵurlym daiyn bolyp shyqty. RTIQ (Resei) mamandary ótkizgen tehnikalyq aýdit óndiristik alańnyń koronavirýsqa qarsy vaktsinanyń daiyn túrin shyǵarý úshin barlyq talaptarǵa sáikes keletinin rastady.
Búgingi tańda Qaraǵandy farmatsevtikalyq kesheni (QFK) halyqaralyq GMP standartyna sáikes biotehnologiialyq preparattardy óndirýge mamandandyrylǵan, barlyq qajetti infraqurylymǵa ie, jetekshi álemdik óndirýshilerdiń tehnologiialyq jáne zerthanalyq jabdyqtarymen jabdyqtalǵan Qazaqstandaǵy alǵashqy jáne ázirge jalǵyz farmatsevtikalyq kásiporyn.
Reseilik «Spýtnik V» vaktsinasyn óndirýshi QFK-da vaktsina óndirisiniń litsenziialary bar jáne noý-haý iesi RTIQ-men seriktestik qarym-qatynas ornatqan.
«Biz RTIQ jetkizetin shikizattan (farmatsevtikalyq sýbstantsiia) daiyn vaktsina shyǵaramyz. QFK menshikti zerthanasy jáne vaktsina jasaýshy - Máskeýdegi Gamaleia atyndaǵy Ǵylymi-zertteý institýtynyń zerthanasy sapany baqylaýdy júzege asyrady. Qatań baqylaýdan ótkennen keiin vaktsina QR Densaýlyq saqtaý ministrliginiń biryńǵai distribiýtoryna jetkiziledi. Preparatty ári qarai alyp júrý - farmakologiialyq qadaǵalaý bizdiń mindetimizge kiredi. Onyń ishinde unamsyz qubylystardy monitoringileý, patsientterdiń ótinishi men shaǵymyn jinaý, taldaý kiredi.
Qaraǵandy farmatsevtikalyq kesheninde COVID-19 qarsy vaktsina óndirý – Qazaqstan halqy úshin basym mánge ie strategiialyq mańyzdy áleýmettik joba. Bul óndiris joǵary tabysty emes, sebebi satý baǵasy tek óndiris shyǵyndaryn jabady. Alaida, vaktsina óndirisiniń basty maqsaty kommertsiialyq paida kórý bolmaǵandyqtan, vaktsinany erekshe jaǵdailarda, iaǵni paidany eskerýsiz shyǵarý týraly sheshim qabyldandy», - dep málimdedi «Qaraǵandy farmatsevtikalyq kesheniniń» bas direktory Sergei Baron.
Joba memleketaralyq kelisimderdiń nátijesinde júzege asyryldy. Oǵan eki memleket úkimetteri men QR Densaýlyq saqtaý ministrligi tikelei jetekshilik etedi. QR DSM men RTIQ arasynda reseilik vaktsinanyń 2 mln dozasyn jetkizý týraly memorandýmǵa qol qoiyldy. Qol jetkizilgen ýaǵdalastyqqa sáikes, 2021 jyldyń maýsymyna deiin vaktsinanyń qajetti kólemin óndirý josparlanyp otyr. Qazirgi ýaqytta QR DSM men QFK arasynda tiisti kelisim jasasý boiynsha jumys júrgizilýde.
QFK – bul jańa farmatsevtikalyq tehnologiialarǵa sáikes jeke investitsiialar úshin jabdyqtalǵan Qazaqstan-Resei birlesken kásiporny. Investorlar tarapynan aldyńǵy qatarly farmatsevtikalyq keshendi jabdyqtaýǵa 50 million dollardan astam qarjy jumsaldy. Maqsaty - qazaqstandyq patsientterdi emdeý úshin ómirlik mańyzdy dárilik preparattar óndirisin oqshaýlaý, sonymen qatar, bul úshin jetekshi reseilik ǵylymi zerthanalardyń quzyreti tartylǵan.
QFK jyl saiyn jetkiziletin dári-dármekterdiń tizbesin keńeite jáne is júzinde bizdiń elimizdiń turǵyndary úshin strategiialyq mańyzdy baǵytta importty almastyrý baǵdarlamasyn júzege asyra otyryp ómirlik mańyzy bar dári-dármekterdi QR Densaýlyq saqtaý ministrliginiń qajettilikteri úshin jetkizýdi iske asyrady. QFK onkologiia, gemofiliia, gepatit, qant diabeti jáne basqalary siiaqty áleýmettik mańyzy bar kúrdeli aýrýlardy emdeýge arnalǵan zamanaýi preparattardy shyǵarady. Osy oraida, 2020 jyldyń sońyna qarai farmatsevtikalyq keshen sońǵy bir jyldyń ózinde 20-ǵa jýyq jańa preparatty shyǵarýdy igerip, 60 túrli dárini óndirdi.
Qazaqstanda buryn óndirilmegen birqatar dári-dármekter jelisin keńeitý jáne importty almastyrý úzdiksiz jalǵasýda. Preparattar QR Densaýlyq saqtaý ministrliginiń biryńǵai memlekettik distribiýtory «SQ-Farmatsiia» kompaniiasyna jetkiziledi. Buryn sheteldik óndirýshiler jetkizgen preparattar baǵasynyń tómendeýinen elimizdiń biýdjetinen osy maqsattarǵa jyl saiyn 1 milliard teńgeden astam qarajat únemdeidi.
Sonymen qatar, QFK Qaraǵandy oblysyndaǵy eń iri salyq tóleýshiler men jumys berýshilerdiń biri, kásiporynda 200 jumys orny uiymdastyrylǵan. QFK-da joǵary tehnologiialyq farmatsevtikalyq ónimderdi óndirý salasynda bilim men tájiribege ie joǵary sanatty mamandar toby (QFK mamandarynyń 99%-y - QR azamattary) jinalǵan.
