Qaraǵandy oblysynyń Jańaarqa aýdanynda ótken merekelik is-sharanyń videosyn Qaraǵandy oblysy PD basshylyǵy zerttep shyqty. Politsei rólinde toidy tekserýge kelgen asaba jaýapkershilikke tartyldy, dep habarlaidy "Ult aqparat".
Tártip saqshylary politsiia formasyn kigen adamnyń asaba ekenin anyqtady.
«Politsiia árqashan ázilge, parodiiaǵa jáne syndarly synǵa oń kózben qaraidy. Biraq mundai videolar ishki ister organdarynyń sanitarlyq dárigerlermen birge karantindi buzýdyń aldyn alyp, koronavirýstyń taralýyna tosqaýyl bolýǵa tyrysqan qyzmetkerleriniń kúsh-jigerin tómendetedi. Osylaisha, tamada politsiia qyzmetkerleriniń bedelin túsirip, toi uiymdastyrýshynyń quqyq buzýyna yqpal etti dep sanaimyz. Belgilengen erejeler men shekteýlerdi saqtaý - óte mańyzdy. Al otbasylyq sharalardy ainalasyndaǵylarǵa qaýip tóndirmei, az adammen ǵana ótkizýge bolady», - dep túsindirdi Qaraǵandy oblysy PD baspasóz hatshysy Janatai Sembekov.
Qazirgi ýaqytta QR ÁQBtK 675-baby boiynsha jalǵan politseilik jaýapkershilikke tartý týraly másele qaralyp jatyr.
Merekeni uiymdastyrýshyǵa qatysty material QR ÁQBtK 425-baby boiynsha ákimshilik jaýapkershilikke tartý úshin tiisti mekemege joldanǵan.
