Qaraǵandy qalasynda «Sarqylmas qazyna» atty shertpe kúi men jyr-termelerdiń oblystyq festivali ótti, dep habarlaidy "Ult aqparat" óńir ákimdigine silteme jasap.
Festivalde Dostyq úiiniń shyǵarmashylyq ortalyqtarynyń tárbielenýshileri respýblikalyq jáne halyqaralyq baiqaýlardyń laýreattary – jas aqyndar óz sheberlikterin kórsetti. Eń jas qatysýshy - 11-synyp oqýshysy Abzal Maqash jeltoqsan aiynyń basynda Qanysh Sátbaevtyń 120 jyldyǵyna jáne Jastar jylyna arnalǵan halyqaralyq aitystyń júldesin ielengen bolatyn. Kórermender dombyra, qobyz jáne jetigen siiaqty túrli halyq aspaptarynyń áýenderine qanyqty. Aqtyq synda aqyndar «Qulmanbet aitys» atty sýyryp salma dodasyn uiymdastyrdy. Festivaldiń sharyqtaý shegi – kúi tartys biregei kórinisi boldy. Bul úlken saltanattar men toilarda tanymal bolǵan ejelgi dástúr. Jarystyń máni – qarsylastyń oryndaǵan belgisiz áýenin kúishi sol mánerde alyp ketip, jalǵastyra alýynda. Kúi siýitasyn dombyrashylar Qanat Baqraev, Qairat Omarov, Temirlan Kýbat oryndady. «Halyqtyń dástúri – qasietti, olardy urpaqtan-urpaqqa jetkizý óte mańyzdy. Bul festival túrli jastaǵy, ártúrli mektep pen mánerdi oryndaýshylardyń basyn biriktirdi. Jastar ulttyq ónerdi jalǵastyrady jáne damytady. Meniń oiymsha, biz kórermenderge halyq mýzykasynyń sulýlyǵyn kórsete aldyq», - dep atap ótti Mońǵoliianyń eńbek sińirgen ártisi jáne Qazaqstan Mádeniet qairatkeri Merýert Bashai. «Bul festivaldi Ulttyq mereke qarsańynda ótkizemiz. Biz Dostyq úiin beibitshilik pen kelisim, azamattyq bastamalar ortalyǵy etýge tyrysýdamyz. «Rýhani jańǵyrý» baǵdarlamasyn júzege asyrýǵa belsendi qatysamyz. Biyl sýyryp salma aqyndar, dombyrashylar mektebi quryldy. Festival osy jumystardyń jalǵasy boldy. «Dombyranyń úni - seniń júregińniń yrǵaǵy» dep beker aitpaidy. Bizdiń halqymyzdyń tarihy ónerge toly, shyǵarmalar arqyly ata-babalarymyzdyń daýysyn estimiz», - dedi Qaraǵandy oblysy ákimi apparatynyń «Qoǵamdyq kelisim» KMM direktory Erlan Qusaiyn.
Shara qatysýshylaryna alǵys hattar tabys etildi. «Arqa-aitys mektebi» ortalyǵyna kúi men jyr-terme jinaqtary bar retro-plastinka syiǵa tartyldy.
