2 sáýirde Qaraǵandyda alty adamǵa koronavirýs juqqany anyqtalǵan edi. Naýqastardyń arasynda Temirtaýda notariýste jumys istegen jaqynda virýstan qaitys bolǵan er adamnyń týystary da bar.
"Qaitys bolǵan adamnyń otbasy músheleri - úsh adam infektsiialyq boksqa jatqyzyldy. Karantindik statsionarda jatqan eki naýqastan da virýs tabylyp, infektsiialyq boksqa jatqyzyldy. Taǵy bir adam - úi karantininde bolǵan, qazir ony aýrýhanaǵa jatqyzyp jatyr. Epidemiologiialyq zertteý júrgizilip jatyr. Úi karantininde bolǵan adammen bailanysta bolǵan adamdar anyqtalyp jatyr" dedi Qaraǵandy oblystyq densaýlyq saqtaý basqarmasy.
Biliktiń habarlaýynsha, marqummen shamamen 200 adam bailanysta bolǵan: 54 adam provizorlyq karantinge jatqyzylǵan, 150 adam - úi karantininde. 2 sáýir kúngi derek boiynsha, Qaraǵandyda 21 adamnan virýs tabylǵan.
Qaraǵandyda koronavirýstan er adam qaitys bolǵannan keiin Temirtaý qalasynyń aýmaǵyna blokbeketter qoiylyp, qorshaldy. Turǵyndarǵa qaladan shyǵýǵa tyiym salyndy. 2 naýryzda tańerteń Temirtaýda daýys údetkishi bar arnaiy kólikter júrip, qalada karantin rejimi ornaǵanyn, turǵyndarǵa karantin erejelerin qatań saqtap, úide qalýǵa keńes berdi. Kóshede adamdar qarasy azaidy.
Buǵan deiin Qaraǵandy oblysynda Qaraǵandy qalasy, Abai, Saran, Shahtinsk qalalary karantinge jabylǵan edi. Blokbeketterde arnaiy jasaq, sanitarlyq qyzmet ókilderi, áskeriler júr.
Oblystyq politsiia departamentiniń dereginshe, meditsinalyq, sanitarlyq qyzmet, quqyq qorǵaý organ ókilderi, qutqarýshylar júk kólikteri men inkassatorlar, ǵuryptyq qyzmet kórsetý mamandary blokbeketterden óte alady. Mundai jaǵdaida olar qyzmettik kýáligi nemese jumystan anyqtama kórsetýi kerek. Blokpostardan ótetin adamdarda meditsinalyq maska, rezina qolǵap, antibakteriialyq gel bolýy kerek.
