2 سەۋٸردە قاراعاندىدا التى ادامعا كوروناۆيرۋس جۇققانى انىقتالعان ەدٸ. ناۋقاستاردىڭ اراسىندا تەمٸرتاۋدا نوتاريۋستە جۇمىس ٸستەگەن جاقىندا ۆيرۋستان قايتىس بولعان ەر ادامنىڭ تۋىستارى دا بار.
"قايتىس بولعان ادامنىڭ وتباسى مٷشەلەرٸ - ٷش ادام ينفەكتسييالىق بوكسقا جاتقىزىلدى. كارانتيندٸك ستاتسيوناردا جاتقان ەكٸ ناۋقاستان دا ۆيرۋس تابىلىپ, ينفەكتسييالىق بوكسقا جاتقىزىلدى. تاعى بٸر ادام - ٷي كارانتينٸندە بولعان, قازٸر ونى اۋرۋحاناعا جاتقىزىپ جاتىر. ەپيدەميولوگييالىق زەرتتەۋ جٷرگٸزٸلٸپ جاتىر. ٷي كارانتينٸندە بولعان اداممەن بايلانىستا بولعان ادامدار انىقتالىپ جاتىر" دەدٸ قاراعاندى وبلىستىق دەنساۋلىق ساقتاۋ باسقارماسى.
بيلٸكتٸڭ حابارلاۋىنشا, مارقۇممەن شامامەن 200 ادام بايلانىستا بولعان: 54 ادام پروۆيزورلىق كارانتينگە جاتقىزىلعان, 150 ادام - ٷي كارانتينٸندە. 2 سەۋٸر كٷنگٸ دەرەك بويىنشا, قاراعاندىدا 21 ادامنان ۆيرۋس تابىلعان.
قاراعاندىدا كوروناۆيرۋستان ەر ادام قايتىس بولعاننان كەيٸن تەمٸرتاۋ قالاسىنىڭ اۋماعىنا بلوكبەكەتتەر قويىلىپ, قورشالدى. تۇرعىندارعا قالادان شىعۋعا تىيىم سالىندى. 2 ناۋرىزدا تاڭەرتەڭ تەمٸرتاۋدا داۋىس ٷدەتكٸشٸ بار ارنايى كٶلٸكتەر جٷرٸپ, قالادا كارانتين رەجيمٸ ورناعانىن, تۇرعىندارعا كارانتين ەرەجەلەرٸن قاتاڭ ساقتاپ, ٷيدە قالۋعا كەڭەس بەردٸ. كٶشەدە ادامدار قاراسى ازايدى.
بۇعان دەيٸن قاراعاندى وبلىسىندا قاراعاندى قالاسى, اباي, ساران, شاحتينسك قالالارى كارانتينگە جابىلعان ەدٸ. بلوكبەكەتتەردە ارنايى جاساق, سانيتارلىق قىزمەت ٶكٸلدەرٸ, ەسكەريلەر جٷر.
وبلىستىق پوليتسييا دەپارتامەنتٸنٸڭ دەرەگٸنشە, مەديتسينالىق, سانيتارلىق قىزمەت, قۇقىق قورعاۋ ورگان ٶكٸلدەرٸ, قۇتقارۋشىلار جٷك كٶلٸكتەرٸ مەن ينكاسساتورلار, عۇرىپتىق قىزمەت كٶرسەتۋ ماماندارى بلوكبەكەتتەردەن ٶتە الادى. مۇنداي جاعدايدا ولار قىزمەتتٸك كۋەلٸگٸ نەمەسە جۇمىستان انىقتاما كٶرسەتۋٸ كەرەك. بلوكپوستاردان ٶتەتٸن ادامداردا مەديتسينالىق ماسكا, رەزينا قولعاپ, انتيباكتەرييالىق گەل بولۋى كەرەك.
