Qaraǵandyda DAISh lańkestik uiymymen bailanysta bolǵan 30 jastaǵy kelinshekke qatysty sot úkimi shyqty. Kámeletke tolmaǵan qaiyn inisin alyp Siriiaǵa attanbaq bolǵan Jansaia Tańatarova 9 jylǵa bas bostandyǵynan aiyryldy. Alaida sottalýshy men onyń týystary úkimmen kelispei otyr. Tipti, Jansaianyń aqyl-esinde kemistik baryn alǵan tartqan olar apelliatsiialyq sotqa aryz beremiz dep otyr.
Tergeý málimetteri boiynsha Jansaia Tańatarova 2016 jyldan beri DAISh uiymynyń ókilderimen bailanysqa túse bastaǵan eken. Sodan beri hat jazysyp, lańkestik uiym ókilderine janashyrlyǵyn bildirip turǵan. Tipti Siriiaǵa jetip, sarbazdarǵa meditsinalyq kómek kórsetpekke bel býypty. 1 jyl boiy hat-habar almasyp, byltyr shetel aspaq bolǵan. Degenmen ol, kólik jaldap, Qaraǵandydan shyǵa beriste ustaldy.
Qairat Qasymov sýdia:
- Tańatarova Jansaia Tólendiqyzy 9 jylǵa bas bostandyǵynan aiyrylsyn. Jazasyn ortasha qaýipsizdik deńgeiindegi mekemede óteidi. Júrgizilgen saraptamalarǵa ketken 68 myń teńge memleket esebine Tańatarovadan óndiriledi.
Tergeý málimetinshe ol bir jyl buryn «lańkestik» baby boiynsha sottalǵan kúieýiniń inisin de ózimen birge shetel asýǵa úgittegen eken. Degenmen Jansaia Tańatarova jáne onyń týystary sol boiy taǵylǵan aiyptarmen kelisken joq.
Tólendi Tańatarov J. Tańatarovanyń ákesi:
- Adam óltirgenge 5 jyl beredi, túk qylmysy joq adamǵa 9 jyl beredi. Osyndai shyndyq bola ma? Eń qurysa shartty jaza berýge bolady ǵoi. Qandai ádildik bar? Shetelde ustap alsa maqul ǵoi. Qaraǵandynyń shekarasynan shyqqan joq. Onyń ústine 100 myń teńgemen Siriiaǵa qalai barady? Onyń ózin bankten nesiege alyp otyr.
Jaqyndary Jansaianyń aqyl esiniń kemistigi bar deidi. Sondyqtan olar áieldiń densaýlyǵyn tolyq tekserip shyǵýǵa talap etkenderimen, sot ruqsat bermedi dep otyr. Al Jambyl oblysyna tanysyna aqsha berýge jolǵa shyqqan beti eken. Kámeletke tolmaǵan qaiyn inisine Siriia týraly qaljyńdap aitypty-mys.
Degenmen tergeýshiler Tańatarovanyń qaiyn inisine jasyn ózgertip, jalǵan jeke bas qujat jasaityn mamandy izdegenin dáleldegen. Al Siriiaǵa aldymen Qyrǵyzstanǵa ótip, keiin Túrkiia arqyly attanbaq bolypty. Lańkestik toptyń ókilderi ony Stambýldyń áýejaiynda kútetin bop ýaǵdalasqan kórinedi. Biraq Qaraǵandydan attap shyqpai-aq ustalǵan onyń jospary iske aspaǵan.
KTK
