Búgin Qaraǵandy qalasynda el Táýelsizdiginiń 30 jyldyǵy men daýylpaz aqyn Qasym Amanjolovtyń 110 jyldyq mereitoiy aiasynda «Qasym úii» rýhani, mádeni, shyǵarmashylyq ortalyǵy ashyldy, - dep habarlaidy Saryarqanews.kz.
Táýelsizdiktiń 30 jyldyq mereitoiy qarsańynda osyndai qýanyshqa ortaqtasyp otyrmyz. Ras, 30 jyl degen tarih úshin aitarlyqtai kóp ýaqyt emes. Biraq, osy jyldardyń ishinde el bolyp eńse túzedik. Qiyndyqtar da boldy. Ony birge eńsere aldyq. Qazaqstannyń álemge belgili el bolýyna Qaraǵandy oblysynyń da qosqan úlesi zor. Óndiriste, ekonomika salalarynda úlken jetistikterimiz bar. Rýhaniiat salasynda da birqatar jobalar júzege asyryldy. Biyl Álihan Bókeihan, Jaqyp Aqbaev, Álimhan Ermekov syndy Alash arystarynyń mereitoilary aiasynda qyrýar jumystar atqaryldy. Oktiabr aýdanynyń atyn ózgertip, Álihan Bókeihan esimin berdik. Ol da, tek, qaraǵandylyqtarǵa ǵana emes, jalpy barlyq qazaqstandyqtar úshin úlken jetistik dep sanaimyn. Ol máseleniń de kóterilgenine kóp jyldar ótken edi. Mine túiini qoiyldy, - dedi aimaq basshysy Jeńis Qasymbek quttyqtaý sózinde.
Shyǵarmashylyq ortalyqtyń ashylý saltanatyna arnalǵan dóńgelek ústeldi «Abai» atyndaǵy memlekettik syilyqtyń iegeri Serik Aqsuńqaruly tizgindedi. Aita ketý kerek, Arqaǵa «Qasym úiin» salý týraly bastamany alǵash kótergen osy azamat edi. Bastama qoldaý taýyp, Táýelsizdik toiy qarsańynda qaraǵandylyqtarǵa úlken tartý jasalyp otyr.
Qasym bálenbai myń adam syiǵan Almatydan pana tappai, qurt aýrýyna shaldyǵyp qaitys bolǵan. Men oblys ákiminiń qabyldaýyna baryp «Qasym osylai qaitys bolǵan adam. Taǵdyry tragediiaǵy toly. Endi Qaraǵandyǵa «Qasym úiin» ashyp qoisaq, qandai keremet bolar edi» dep usynys bildirgen edim. Jeńis Mahmuduly birden qoldaý kórsetti. Jái ýáde berip qana qoimai, óziniń ultjandy, memleketshil jan ekenin kórsetip, osyndai ásem ǵimaratty tartý etti. Barsha ádebietshi qaýymnyń atynan quttyqtai otyryp, alǵys bildiremin, - dedi Serik Aqsuńqaruly.
«Qasym úiiniń» ashylý saltanatyna Jazýshylar Odaǵynyń basqarma Tóraǵasy Ulyqbek Esdáýlet, «Juldyz» jýrnalynyń bas redaktory Ǵalym Jailybai jáne aqyn Maraltai Raiymbekuly arnaiy kelgen eken.
Qazaqtyń qai óńirine barsań da tarihtan syr shertip turady ǵoi. Mysaly, Qaraǵandy men Qarqaralynyń ár tasy tarih bolyp sóilep jatady. Al, qazir qarasam Qaraǵandy oblysynyń ár kúni tarihqa ainalyp jatyr eken. Ótkende ǵana Qarqabat ananyń eskertkishiniń ashylýyna qatystyq. Odan soń «Qasym qudyǵynyń» jóndelgenine kýá boldyq. Kúni keshe ǵana bolmai qalǵan kommýnizmniń elesindei bolyp turǵan Oktiabr aýdanynyń ataýyna Álihan Bókeihan esimi berildi. Búgin «Qasym úii» ashylyp otyr. Bul ádebiet úshin, mádeniet úshin óte mańyzdy shara, - dedi Jazýshylar Odaǵynyń basqarma tóraǵasy Ulyqbek Esdáýlet.
Saltanatty sharada E.Bóketov atyndaǵy Qaraǵandy ýniversitetiniń basqarma tóraǵasy Nurlan Dýlatbekovtiń bastamasymen jaryq kórgen Qasym Amanjolovtyń bibliografiialyq jinaǵynyń tanystyrylymy ótti. Sondai-aq, Jazýshylar Odaǵynyń Qaraǵandy oblystyq filialynyń direktory Janat Jańqashulynyń "Oitamǵan" jyr jinaǵynyń tusaýy kesildi.
Shyǵarmashylyq ortalyqta Qasym Amanjolovtyń murajaiy ornalasqan. Onda aqynnyń sirek kezdesetin sýretteri, ózi tutynǵan siiasaýyty men qalamsaby jáne basqa da jádigerler qoiylǵan eken. Sondai-aq, kórmege aqynnyń týǵan jeri Saryobaly aýylynan Dáýletqazy Muqadiuly arnaiy kelip, Qasymnyń kindigin keskeni úshin ákesi Raqymjannyń Sháriia Sadyqqyzyna tartý etken kúmis bilezik pen júzikti alyp kelgen eken.
Bul jádigerler bizdiń áýlette saqtalyp kele jatqanyna ǵasyrdan asyp ketti ǵoi. Kúni keshe Janat Jańqashuly habarlasyp, kórmege alyp kelýimdi suraǵan. Ras, mýzeige tapsyrý týraly da usynys tústi. Biraq, otbasylyq jádiger bolǵandyqtan, ózim bilemge salyp, sheshim qabyldai almadym. Týystarymmen aqyldasý kerek. Degenmen, túbi mýzeige beretin shyǵarmyz, - deidi Dáýletqazy Muqadiuly.
«Qasym úii» shyǵarmashylyq ortalyǵynda aqyn mýzeiinen bólek, Jazýshylar odaǵynyń Qaraǵandy oblystyq filialy, aqyn Serik Aqsuńqaruly atyndaǵy kabinet, «Qasym» jýrnalynyń redaktsiiasy, májilis zaly ornalasqan. Sondai-aq, Qaraǵandy oblysynyń tilderdi damytý jónindegi basqarmasy, «Rýhani jańǵyrý» jobalyq keńsesi, Óńirlik kommýnikatsiialar qyzmeti alańyna da oryn bólinipti.
