Foto: © depositphotos.com
Qaraǵandydaǵy oblystyq klinikalyq aýrýhanada dárigerler naýqastyń "TsEF-3 preparatyna qatty allergiia bar" degen sózine nazar aýdarmai, antibiotikti ekken. Saldarynan naýqas anafilaktikalyq shok alyp kóz jumǵan. Qaiǵyly oqiǵa 8 qarashada boldy, - dep habarlaidy Tengrinews.kz saity "Patriot" Telegram-arnasyna silteme jasap.
Marqumnyń týystary oqiǵa qalai bolǵanyn aitty.
"Aǵam memlekettik qyzmet portaly arqyly josparly naýqas retinde tústi. Oǵan gemorroidy alyp tastaý úshin ota jasalýy kerek edi. Ol dárigerlerge Tsef-3 preparatyna jáne novokainge allergiiasy baryn aitty. Dárigerler onyń bilegine osy preparattarǵa allergiiasy baryn bildiretin kók tústi japsyrmalary bar bilezik taqqan. Biraq medbike aǵamnyń palatasyna kirip, Tsef-3 salǵan. Tórejan qyzaryp, tunshyǵyp, qaitys boldy", - deidi 40 jastaǵy marqum Tórejannyń aǵasy Arman Maqashev.
Tórejan Maqashev qylmystyq-atqarý júiesi departamentinde jumys istegen. Endi onyń artynda úsh balasy jetim, áieli jesir qaldy.
"Dárigerler nemquraidy qarap, aǵamdy óltirdi. Gemorroidy alyp tastaý operatsiiasyna kirisip te úlgermegen! Naýqastyń Tsef-3-ke allergiiasy baryn bile otyryp, qalai ýkol salýǵa bolady? Dárigerler nazar aýdarmasa, bilezikti ne úshin taǵady?" - deidi marqumnyń baýyry.
Bul derek boiynsha qylmystyq is qozǵalypty. Qaraǵandy oblysy Densaýlyq saqtaý basqarmasy basshysynyń orynbasary Qanat Abzalievtiń aitýynsha, tekseris júrgizilgen.
"Anafilaktikalyq reaktsiia óte aýyr bolǵan. Tekseris barysynda jiberilgen qateler anyqtaldy. Qabyldaý bólmesiniń dárigerleri, proktologiialyq bólim meńgerýshisiniń m.a. jáne medbike allergiialyq anamnezdi durys jinamaǵany anyqtaldy", - dep túsindirdi Abzaliev.
