Videodan alynǵan kadr
Qaraǵandyda kópirdiń ústinde qarsy baǵytqa shyǵyp, jol apatyna sebepker bolǵan avtobýs júrgizýshisi 9 jylǵa sottaldy, - dep habarlaidy Tengrinews.kz saity KTK telearnasyna silteme jasap.
Prokýror áýelide ony 7 jylǵa sottaýdy suraǵan. Alaida sýdianyń aitýynsha, eki adam kóz jumyp, 20-sy jaraqat alǵan apatqa sebep bolǵan júrgizýshiniń kináni moiyndamaǵany jazany aýyrlatqan.
"Ol ádeii istemese, rólden sekirmes edi. Ol ádeii istemese, qulaqqappen sóilespes edi. Men týra artynda otyrdym. Ol qalai sóileskenin, qalai sekirgenin bárin kórdim. 10 ai aýrýhanadan shyqpadyq. Eger de ol qatty júrmegende, eger de ol telefonmen sóilespegende bári basqasha bolýshy edi. Búkil júrgizýshige bul sabaq bolýy kerek, - dedi zardap shegýshi Aiagóz Sanaqbai.
Byltyr qarashanyń 25-i kúni tańǵy saǵat toǵyzda 33 jastaǵy Aidyn Orazov tizgindegen avtobýs kópirdiń ústinde qarsy baǵytqa shyqqan. Ol aldynda kele jatqan eki avtobýstan ozbaq bolǵanda, qarsy baǵytta kópirge kóterilip kele jatqan 41-baǵyttaǵy avtobýsqa soqtyǵysqan. Sonyń saldarynan avtobýstyń 66 jastaǵy júrgizýshisi sol jerde opat boldy.
Al sottalýshy tizgindegen avtobýstaǵy zardap shekken 19 jastaǵy stýdent qyz aýrýhanada kóz jumdy. 20 shaqty adam túrli jaraqat alyp, keibiri áli emdelip júr.
Júrgizýshiniń ózi de aýyr jaralanyp, emdelgen. Alaida ol sot protsesinde kinásin moiyndamaǵan. Ol sot sheshimi boiynsha qatty zardap shekken eki adamǵa 1 million teńgeden óteýge tiis. Qalǵany moraldyq shyǵyndy azamattyq sotta daýlai alady. Sottalýshynyń jaǵy úkimmen kelisken joq.
"Jyldamdyqty asyrǵanyn joqqa shyǵardy. Dóńgelektiń jeli shyǵyp ketti dedi. Kóktaiǵaq boldy dedi. Kinásin tolyq moiyndaǵan joq. Atalaǵan bap 5 ten 10 jylǵa deiingi jazany qarastyrady. Qylmysty jeńildetetin jáne aýyrlatatyn jaǵdailardy zerttei kele, 9 jyl bas bostandyǵynan aiyrý sheshimi shyqty", - dedi sýdia Aigúl Myrzabekova.
