Foto: Polisia.kz
Qaraǵandy qalasynda uiymdasqan qylmysqa qarsy kúres basqarmasynyń qyzmetkerleri prokýratýramen birlesip, balalar men áleýmettik osal azamattardan júieli túrde aqsha bopsalaýmen ainalysqan uiymdasqan toptyń áreketin áshkereledi, dep habarlaidy Ult.kz.
Tergeý málimetinshe, qylmystyq toptyń qurbandary óńirdegi balalar mekemeleriniń birinde tárbielenip jatqan jetkinshekter bolǵan. Sońǵy alty ai ishinde kúdiktiler aldaý, qorqytý jáne kúsh qoldaný arqyly birneshe jábirlenýshiden 10 million teńgeden astam qarajatty iemdengen.
Anyqtalǵandai, kúdiktiler balalardy arnaiy shottarynan aqsha sheshýge jáne mikrofinans uiymdarynan nesie rásimdeýge májbúrlegen.
Tintý barysynda qylmystyq top múshelerinen atys qarýy men 100-den astam oq-dári tárkilendi.
Qazirgi ýaqytta barlyq kúdiktiler ustalyp, qamaýǵa alyndy. Olarǵa 10 jylǵa deiin bas bostandyǵynan aiyrý jazasy qaýpi tónip tur. Politsiia olardyń ózge de osyǵan uqsas qylmystarǵa qatysy bar-joǵyn tekserýdi jalǵastyrýda.
