Qaraǵandy óńirinde Abaidyń 175 jyldyǵyna orailastyrylǵan sharalar jalǵasýda. Oblystyq balalar kitaphanasy «Abai jaqqan bir sáýle...» atty dárister seriiasyn ótkizbek, dep habarlaidy "Ult aqparat".
Biylǵy jyly qazaqtyń uly aqyny, oishyl Abaidyń týǵanyna 175 jyl tolady. Qaraǵandy oblystyq Abai atyndaǵy balalar kitaphanasynda jyl boiy mereitoiǵa arnalǵan ártúrli sharalar ótetin bolady.
Olardyń qatarynda ár toqsan saiyn «Abai jaqqan bir sáýle...» taqyrybynda lektsiia uiymdastyrý josparlanǵan.
Dáriskerler – filologiia ǵylymdarynyń doktory, E. Bóketov atyndaǵy Qaraǵandy memlekettik ýniversitetiniń rektory Berik Rahymov pen filologiia ǵylymdarynyń doktory, professor, «Sotsiým. Til. Mádeniet» qoǵamdyq birlestiginiń prezidenti Nursulý Bóketova.
Birinshi dáris 12 aqpanda ótedi. Bastalýy saǵat - 12.00. Sharaǵa qala mektepteriniń 9-11 synyp oqýshylary shaqyryldy.
Esterińizge sala keteiik, balalar kitaphanasynda Uly aqynnyń 175 jyldyǵyna arnalǵan mýltimediialyq kórme-installiatsiia ashyldy. Ol jyl sońyna deiin jumys isteitin bolady.
