Qaraǵandy oblysynda qylmystyq top 17 jalǵan kompaniiany paidalanyp, 15 milliardtan astam teńgeni qolma-qol aqshaǵa ainaldyrǵan. Bul týraly "Ult aqparat" QR QM Qarjy monioringi komitetiniń baspasóz qyzmetine silteme jasap habarlaidy.
«Ekonomikalyq tergeý departamentiniń qyzmetkerleri «STOP-OBNAL» jedel aldyn-alý sharasyn ótkizý nátijesinde jumystardy naqty oryndamai jáne taýarlardy jetkizbei jalǵan shot-faktýralardy zańsyz rásimdeýmen ainalysqan uiymdasqan qylmystyq toptyń áreketin áshkereledi. Tergeý amaldary barysynda qylmystyq toptyń áreketine qatysty 5 tulǵa anyqtaldy. 19 mekenjai boiynsha júrgizilgen tintý sharalary nátijesinde júielik bloktar jáne «1S Býhgalteriia» baǵdarlamasy bar qatqyl diskiler, 17 zańdy tulǵanyń ETsQ-kiltteri, «kóleńkeli» býhgalteriia, 20 mór, uialy telefondar tárkilendi», - delingen habarlamada.
Qylmystyq toptyń músheleri kedergisiz ekinshi deńgeili bankterden 150 mln teńge jáne odan asa soma kóleminde qarajatty ózine baǵynyshty firmalardyń esebinen alyp otyrdy.
17 jalǵan bir kúndik kompaniianyń qylmystyq áreketiniń jalpy ainalymy 15 mlrd teńgeden astam somany qurady. Nátijesinde, memleketke salyq tólemeýden kelgen zalal 3 mlrd teńgeden astam somaǵa teń.
Aita ketsek, qylmystyq áreker úshin segiz jyldan on úsh jylǵa deiin bas bostandyǵynan aiyrý jazasy qarastyrylǵan.
