Foto: TJM baspasóz qyzmeti
Qaraǵandydaǵy kópqabatty úide órt shyqqan páterdiń qojaiyny zeinetke shyqqan politsiia polkovnigi jáne onyń otbasy músheleri ekeni belgili boldy, dep habarlaidy QazAqparat.
Keshe Qaraǵandydaǵy ot sharpyǵan páterdiń iesi - zeinettegi politsiia polkovnigi. Qaza tapqan taǵy eki adam - onyń jubaiy men aǵasy bolǵan.
70 jastaǵy polkovnik Rinat Shoqaev buǵan deiin QR IIM B. Beisenov atyndaǵy Qaraǵandy akademiiasynyń saptyq bólim boiynsha bastyǵynyń orynbasary bolyp jumys istegen.
Ol akademiia kýrsynyń bastyǵy bolǵan. Marqumnyń dostary men tanystarynyń aitýynsha, Rinat Kenjebaiuly osy ýniversitettiń damýyna zor úles qosqan. Kóptegen ofitserlerdi tárbielegen. Ol 70 jasta edi.
Páterde sonymen qatar olardyń 43 jastaǵy uly bolǵan.
Onyń 8-shi qabattyń terezesinen qalai qulap ketkeni áli belgisiz. Qazir ol aýrýhanada jatyr.
«Naýqastyń jaǵdaiy ortasha aýyr. Esin biledi. Jansaqtaý bóliminde. Dárigerler barlyq qajetti meditsinalyq kómek kórsetip jatyr. Naýqas keýde qýysynan jabyq jaraqat alǵan, jilinshik súiekteri synǵan», - dep habarlady Qaraǵandy oblysy densaýlyq saqtaý basqarmasynyń baspasóz qyzmeti.
Eske sala keteiik, 10 qańtar kúni saǵat 21:29-da Qaraǵandy qalasynda Respýblika dańǵyly, 18/2 mekenjaiynda órt shyqqany týraly habar tústi.
16 qabatty, 127 páterli turǵyn úidiń 8-qabatyndaǵy páterde jalpy alańy 30 sharshy metr aýmaqta órt shyqqan.
1979 jyly týǵan er adam janyp jatqan páterdiń balkonynan qulap, meditsinalyq mekemege jatqyzyldy.
Tekserý barysynda úsh adamnyń denesi tabyldy (boljam boiynsha eki er adam men áiel).
Sondai-aq, Qaraǵandy oblysynyń TJD basshylyǵy gaz jarylysy rastalmaǵanyn habarlady. Oqiǵa ornynan gaz qurylǵylary tabylmaǵan.
Kópqabatty úidegi órt boiynsha Qylmystyq kodekstiń 204-baby 2-tarmaǵymen qylmystyq is qozǵaldy.
