Biyl Qaraǵandy, Jezqazǵan, Temirtaý qalalarynda jalpy 398 úidiń turǵyndaryna gaz beriledi. Bul týraly búgin Úkimet úiindegi baspasóz máslihatynda QR Energetika vitse-ministri Murat Júrebekov aitty, dep habarlaidy "Ult aqparat".
«Qaraǵandy oblysynyń ákimdigi avtomattandyrylǵan gaz taratý stansasynan Qaraǵandy, Temirtaý jáne Jezqazǵan qalalaryna gaz qubyryn burý jáne taratý jelilerin salýdy qarastyryp otyr. Qaraǵandy oblysynda gaz taratý jelisin salý úshin biyl respýblikalyq biýdjetten 2,4 mlrd teńge bólingen. Onyń 1 mlrd teńgesi Qaraǵandy, 1 mlrd teńgesi Jezqazǵan, 400 mln teńgesi Temirtaý qalasyna jumsalady», - dedi vitse-ministr.
Onyń dereginshe, 3 qalada da merdiger uiym aiqyndalyp, olar qurylys-montajdaý jumystaryn bastap ketti. Qaraǵandy qalasyna 38 shaqyrym nemese josparlanǵan qubyrdyń 90 paiyzy jetkizildi. Al Jezqazǵan qalasyna josparlanǵan qubyr ónimderi 100 paiyz jetkizilip, onyń 66 paiyzy dánekerlengen. Temirtaý qalasyna da qubyr ónimderi 100 paiyz jetkizilip, 50 paiyzdan astamy dánekerlenip úlgerdi.
«Qaraǵandy oblysynyń ákimdigi jyl sońyna deiin Jezqazǵanda - 148, Temirtaýda - 100, Qaraǵandyda 150 úidiń turǵyndaryna gaz qosýdy josparlap otyr. Tolyqtai alǵanda, Qaraǵandy oblysy ákimdiginiń aqparatyna sáikes, 1-kezeń qurylysyn aiaqtaý 2020 jyldyń mamyryna josparlanǵan», - dedi Murat Júrebekov.
