Qaraǵandy oblysynda «Egindibulaq-Qaraǵandy» baǵytyndaǵy jolaýshylar avtobýsy aýdarylyp, saldarynan 3 adam jaralandy, dep habarlaidy "Ult aqparat".
Jol apaty Buqarjyraý aýdanyndaǵy «Qaraǵandy-Aiagóz-Buǵaz» tas jolynyń 103-shaqyrymynda, Sheshenqara kentinen 15 shaqyrym qashyqtyqta bolǵan.
«45 adam qutqaryldy. Jolaýshylar Sheshenqaradaǵy mektep ǵimaratyna ornalastyryldy. Úsh adam aýrýhanaǵa jatqyzyldy», - dep habarlady oblystyq TJ departamentiniń baspasóz qyzmetinen.
Sońǵy 8 saǵattyń ishinde qaraǵandylyq qutqarýshylar qar qursaýynda qalǵan 20 adamǵa kómek kórsetken.
Saǵat 10:32-de Abai aýdanynda qutqarýshylar Volnyi jáne Agrogorodok kentteriniń arasynda jolda qalyp qoiǵan úsh kóliktegi 10 adamǵa kómektesti.
12:34-te Almaty-Ekaterinbýrg tas jolynyń 986-shaqyrymyndaǵy Jumabek aýylynyń mańynda júk kóligi men jolaýshylar avtobýsy soqtyǵysyp qaldy. TJ qyzmetkerleri bir adamdy qutqaryp, taǵy 15-in Qaraǵandyǵa jetkizdi. Olarǵa meditsinalyq kómektiń qajeti bolǵan joq.
Sondai-aq Jańaarqa aýdanyndaǵy Aqtúbek aýylyna jaqyn jerde qar qursaýynda qalǵan jeńil kólikterden 11 adam qutqaryldy.
Almaty-Ekaterinbýrg tas jolynyń 1045-shaqyrymynda synyp qalǵan «Shymkent-Astana» avtobýsynyń jolaýshylaryn qutqarýǵa jergilikti 52859 áskeri bóliminiń sarbazdary jumyldyryldy. 37 adam Temirtaýǵa jetkizildi.
