Qaraǵandy oblysynyń Jańaarqa aýdanynda kóliginde 274 kiik múiizi men túrli markaly qarýy bar úsh er adam quryqtaldy. Ustalǵandar jeti jylǵa deiin bas bostandyǵynan aiyrylýy múmkin, dep habarlaidy "Ult aqparat".
Qaraǵandy oblysy Politsiia departamentiniń kriminaldyq politsiia basqarmasynyń qyzmetkerleri Qyzyl kitapqa engizilgen janýarlardyń múiizderin satý salasyndaǵy qylmystardy anyqtaý jáne jolyn kesý boiynsha is-sharalardy ótkizý barysynda 15 sáýir kúni Qaraǵandy oblysy Jańaarqa aýdany kentteriniń birinde 34 jastaǵy er adamnyń basqarýyndaǵy avtokólikti ustady.
«Atalǵan kólik quralynyń salonynda Jańaarqa aýdanynyń 34 jastaǵy turǵyny jáne Qaraǵandy qalasynyń 28 jastaǵy eki turǵyny bolǵan. Tekserý jáne tergeý amaldary kezinde politseiler ustalǵandardan 274 kiik múiizi men túrli markaly qarý tárkiledi», - dedi oblystyq PD bastyǵynyń orynbasary Ábil Ábildin.
Atalǵan fakti boiynsha QR QK 339-baby «sirek kezdesetin jáne quryp ketý qaýpi tóngen, sondai-aq paidalanýǵa tyiym salynǵan ósimdikter men janýarlar túrlerin, olardyń bólikteri men derivattaryn zańsyz paidalaný» boiynsha sotqa deiingi tergeý bastaldy. Osy baptyń sanktsiiasy jeti jylǵa deiingi merzimge bas bostandyǵynan aiyrý túrindegi jazany kózdeidi. Sondai-aq, QR QK 287-baby «oq qarýyn zańsyz saqtaý» boiynsha tergeýden ótedi. Tergeý amaldary júrgizilýde. Ustalǵandar qamaýǵa alyndy.
