Úkimet basshysy Álihan Smaiylov pen Prezident Ákimshiliginiń Basshysy Murat Nurtileýdiń qatysýymen Qaraǵandy oblysynyń barlyq deńgeidegi máslihattar depýtattarynyń jinalysy ótti, dep habarlaidy "Ult aqparat" primeminister.kz saityna silteme jasap.
Depýtattardyń qaraýyna óńir ákimi laýazymyna eki kandidatýra usynyldy – Aimaqov Serjan Jańabekuly jáne Bólekpaev Ermaǵanbet Qabdýlauly. Premer-Ministr Memleket basshysynyń tiisti hatyn oqydy.
Ashyq daýys berý nátijeleri kelesidei boldy: S. Aimaqovtyń kandidatýrasyn 40 depýtat qoldady, E. Bólekpaevqa 138 depýtat daýys berdi. Jinalysqa barlyǵy 178 depýtat qatysty.
Óńir aktivimen kezdesýde Premer-Ministr oblys basshylyǵy óńirlik ekonomikany, infraqurylymdy, kásipkerlikti jáne áleýmettik salany damytý jónindegi sharalardy iske asyrýdy jalǵastyrýǵa tiis ekenin atap ótti.
Álihan Smaiylov áleýmettik mańyzy bar azyq-túlik taýarlary baǵasynyń kúrt jáne negizsiz ósýine jol bermeýdi basty basymdyqtardyń biri dep atady.
«Naryqty otandyq óndiristiń sapaly ónimderimen qamtamasyz etý boiynsha jumys júrgizý qajet. Onyń keń assortimenti men jetkilikti bolýy baǵanyń ósýin tejeidi. Ákimdik osy baǵytta jumys isteýi kerek», — dedi ol.
Sonymen qatar Premer-Ministr birqatar ózekti máselelerge nazar aýdardy. Máselen, modernizatsiia qarqyny tómen jáne tehnologiialyq jaǵdaiy nashar «ArselorMittal Temirtaýdaǵy» jaǵdai alańdaýshylyq týǵyzady, ónerkásiptik qaýipsizdikke nemquraily qaraýdyń saldarynan ólim-jitim sany artyp otyr.
Ol búgin óndiriste taǵy bir qaiǵyly jaǵdai oryn alyp, kásiporyn qyzmetkeri qaza tapqanyn atap ótti.
«Munyń bári – kompaniia basshylyǵynyń tikelei jaýapkershiligi. Osyǵan bailanysty olarǵa kásiporynnyń eshqandai syn kótermeitin barlyq baǵyttary boiynsha narazylyq bildirildi. Qazir Úkimet bul máselelerdi retteý boiynsha belsendi kelissózder bastap ketti», — dedi Álihan Smaiylov.
Sondai-aq ol ónerkásiptik óndiristerdiń ekologiialyq jaǵdaiǵa tigizetin zardabyn azaitý, «Saran» indýstriialyq aimaǵyn damytý, bilikti mamandardy daiarlaý, jalaqyny ýaqytyly tóleý jáne óndiristegi jazataiym oqiǵalardyń aldyn alý máselelerin baqylaýda ustaý qajettigin atap ótti.
