Kórneki sýret: elements.envato.com
Qaraǵandyda Shet aýdany Aqadyr aýylynyń turǵynyna qatysty sot úkimi shyqty. Sot ony kináli dep taýyp, ómir boiyna bas bostandyǵynan aiyrdy, - dep habarlaidy Tengrinews.kz.
Daýly is qylmystyq ister jónindegi oblystyq mamandandyrylǵan aýdanaralyq sotynda qaraldy. Tergeý málimetteri boiynsha, sottalýshy basqa qylmysyn jasyrý úshin úsh adamdy óltirgen.
Is materialdaryna sáikes, 11 tamyzda ol áriptesiniń garajynan úrlenetin rezeńke qaiyq urlap ketken. 12 tamyzda áriptesiniń áieli onyń urlaǵanyna kúdiktenip, politsiiaǵa habarlasamyn dep qorqytqan. Tergeý málimetterinshe, sottalýshy qylmystyq jaýapkershilikke tartylýdan qorqyp, aldymen áriptesiniń áielin, sodan keiin qyzyn, odan soń uiyqtap jatqan úi iesiniń ózin óltirgen. Tergeý barysynda úsh jábirlenýshige pyshaq jaraqatyn salǵany anyqtaldy.
Prokýror sottan kúdiktini ómir boiy bas bostandyǵynan aiyrýdy surady. Jábirlenýshi tarap sottalýshyny zańnyń barlyq qatańdyǵy boiynsha jazalaýdy surady.
Sottalýshynyń advokaty qylmys quramy joq bolýyna bailanysty urlyq deregi boiynsha ony aqtaýdy jáne eń az jaza taǵaiyndap, tek kisi óltirgeni úshin sottaýdy surady.
Sottalýshy aiyp taǵylǵan baptar boiynsha kináli dep tanyldy. Oǵan qylmystyq-atqarý júiesiniń tótenshe qaýipsiz mekemesinde jazasyn óteý jáne ómir boiyna bas bostandyǵynan aiyrý túrinde úkim shyǵaryldy. Ol alǵashqy 5 jylyn tolyq qaýipsiz qylmystyq-atqarý júiesi mekemesinde ótkizedi. Sondai-aq, odan jábirlenýshilerdiń paidasyna 15 million teńge kóleminde ótemaqy óndirildi.
"Sottalýshynyń kinási ishinara moiyndaýymen, kýágerlerdiń aiǵaqtarymen, zattai dáleldemelermen, saraptama qorytyndylarymen jáne istiń basqa da materialdarymen dáleldendi. Is boiynsha jeńildetetin jáne aýyrlatatyn mán-jailar anyqtalǵan joq. Úkim zańdy kúshine enbedi", - dedi Qaraǵandy oblysynyń qylmystyq ister jónindegi mamandandyrylǵan aýdanaralyq sotynyń qyzmetkeri.
