Qaraǵandy oblysynyń prokýrory nelikten pogonyn teris taǵyp alǵanyn túsindirdi, - dep habarlaidy Tengrinews.kz.
Oblys ákimi Jeńis Qasymbektiń jetekshiligimen ótken apparattyq keńeste qyzyq oqiǵa boldy. Jiynda Bas prokýratýranyń Quqyqtyq statistika jáne arnaiy esepke alý jónindegi komitettiń Qaraǵandy oblysy boiynsha departamentiniń basshysy Juldyz Bulambekova da sóz sóiledi. Jeli qoldanýshylary qadaǵalaý organy ókiliniń arnaiy kiiminiń jarǵyǵa sáikes kelmeitinin, onyń oń iyǵyndaǵy pogony qarama-qarsy baǵytta bekitilgenin baiqaǵan.
Juldyz Bulambekova Tengrinews.kz tilshisine bergen suhbatynda bul oqiǵa týraly aityp berdi. Onyń aitýynsha, ákimdiktegi otyrys beinekonferents bailanys arqyly tańǵy saǵat 8.30-da bastalǵan.
"Bir kún buryn jeidemdi jýdym. Tańerteń asyǵys bolǵandyqtan, jeideme pogon taǵýdy jasóspirim qyzyma tapsyrǵanmyn. Sosyn tez kiinip, ákimdikke júgirdim. Sebebi, jinalysta birinshi sóileitinmin. Jolda, ákimdikte pogonymnyń teris taǵylyp turǵanyn eshkim aitpady. Beinekonferentsiiaǵa qosylyp, baiandamamdy oqydym.
Bar bolǵany osy. Úide asyǵys bolǵandyqtan ainaǵa da qarap úlgermedim. Tek keiinirek, biraz ýaqyttan keiin jinalystan shyqqanymda, pogondardyń durys salynbaǵanyn bildim", - dep túsindirdi ol.
Bulambekova budan bylai jumysqa ózi kiimin daiyndaitynyn aitty.
"Qyzyma urysqan joqpyn, kináli ózim ǵoi. Kishkentai qyz qaidan bilsin. Budan bylai pogondardy ózim bekitemin. Bolǵan jaǵdaiǵa ókinemin. Qazir men internettegi "juldyzbyn". Jalpy, mundai oqiǵa meniń ómirimde birinshi ret bolyp otyr", - dedi basqarma bastyǵy.
