Qaraǵandy oblysynyń Qarqaraly aýdany Núrken Ábdirov aýylynyń shetinde birneshe úi men aýlaǵa erigen qar sýy kirdi, - dep habarlady oblystyq tótenshe jaǵdailar departamentiniń baspasóz qyzmeti.
Baspasóz qyzmetiniń ókili Qýanysh Mýtallapovtyń Azattyqqa aitýyna qaraǵanda, sý basý oqiǵasy 30 naýryzda bolǵan.
- Buǵan deiin eki kún qar aralas jańbyr jaýyp, dalanyń qary kúrt eridi. Soǵan bailanysty dala sýy túgeldei aýylǵa qarai júrip, aýyldyń shetindegi 7 úidiń ishine, 9 úidiń aýlasy men qora-jaiyna kirdi. Biraq kirgen sý deńgeii belýardan keletindei emes, 5-10 santimetr shamasyndaǵy tereńdikte ǵana, sonshalyqty qulatatyndai qaýipti bolǵan joq. Túnde sý deńgeii kóterilip ketse kóshirý qiyndaidy degen qaýippen keshe 30 adamdy evakýatsiialadyq, olardyń kóbi týystarynyń úilerine bardy, - dedi Mýtallapov.
Onyń sózinshe, sýdyń baǵyty basqa jaqqa qarai burylyp, qazir sýdyń beti qaityp, aýlalar men úilerdegi sý túsken. Oǵan qosa búgin kún sýytyp, azdap aiaz turyp, sý qatqaqtandy.
Aýyl turǵyny Maqsat Toiyndyqovtyń aitýynsha, aýyl Jarly ózeniniń eki jaǵasynda ornalasqan. Sý negizinen ózenniń bir jaǵyndaǵy úilerge kelgen. Ol erigen qar sýy qorasyna kirgenin aitady. Tótenshe jaǵdai qyzmetiniń kólikteri men adamdary aýylǵa kelip, turǵyndardy ózennen ótkizip jatyr.
