قاراعاندى وبلىسىنىڭ قارقارالى اۋدانى نٷركەن ەبدٸروۆ اۋىلىنىڭ شەتٸندە بٸرنەشە ٷي مەن اۋلاعا ەرٸگەن قار سۋى كٸردٸ, - دەپ حابارلادى وبلىستىق تٶتەنشە جاعدايلار دەپارتامەنتٸنٸڭ باسپاسٶز قىزمەتٸ.
باسپاسٶز قىزمەتٸنٸڭ ٶكٸلٸ قۋانىش مۋتاللاپوۆتىڭ ازاتتىققا ايتۋىنا قاراعاندا, سۋ باسۋ وقيعاسى 30 ناۋرىزدا بولعان.
- بۇعان دەيٸن ەكٸ كٷن قار ارالاس جاڭبىر جاۋىپ, دالانىڭ قارى كٷرت ەرٸدٸ. سوعان بايلانىستى دالا سۋى تٷگەلدەي اۋىلعا قاراي جٷرٸپ, اۋىلدىڭ شەتٸندەگٸ 7 ٷيدٸڭ ٸشٸنە, 9 ٷيدٸڭ اۋلاسى مەن قورا-جايىنا كٸردٸ. بٸراق كٸرگەن سۋ دەڭگەيٸ بەلۋاردان كەلەتٸندەي ەمەس, 5-10 سانتيمەتر شاماسىنداعى تەرەڭدٸكتە عانا, سونشالىقتى قۇلاتاتىنداي قاۋٸپتٸ بولعان جوق. تٷندە سۋ دەڭگەيٸ كٶتەرٸلٸپ كەتسە كٶشٸرۋ قيىندايدى دەگەن قاۋٸپپەن كەشە 30 ادامدى ەۆاكۋاتسييالادىق, ولاردىڭ كٶبٸ تۋىستارىنىڭ ٷيلەرٸنە باردى, - دەدٸ مۋتاللاپوۆ.
ونىڭ سٶزٸنشە, سۋدىڭ باعىتى باسقا جاققا قاراي بۇرىلىپ, قازٸر سۋدىڭ بەتٸ قايتىپ, اۋلالار مەن ٷيلەردەگٸ سۋ تٷسكەن. وعان قوسا بٷگٸن كٷن سۋىتىپ, ازداپ اياز تۇرىپ, سۋ قاتقاقتاندى.
اۋىل تۇرعىنى ماقسات تويىندىقوۆتىڭ ايتۋىنشا, اۋىل جارلى ٶزەنٸنٸڭ ەكٸ جاعاسىندا ورنالاسقان. سۋ نەگٸزٸنەن ٶزەننٸڭ بٸر جاعىنداعى ٷيلەرگە كەلگەن. ول ەرٸگەن قار سۋى قوراسىنا كٸرگەنٸن ايتادى. تٶتەنشە جاعداي قىزمەتٸنٸڭ كٶلٸكتەرٸ مەن ادامدارى اۋىلعا كەلٸپ, تۇرعىنداردى ٶزەننەن ٶتكٸزٸپ جاتىر.
