Qaraǵandy oblysynda jol apatynan eki dáriger qaza taýyp, "Jezqazǵan meditsinalyq ortalyǵy" JShS Balqash qalalyq emhanasynyń segiz meditsina qyzmetkeri zardap shekti.
"QR Densaýlyq saqtaý ministrligi Qaraǵandy oblysy Aqtoǵai aýdany Saryshaǵan aýylynyń janynda bolǵan qaiǵyly oqiǵaǵa bailanysty qaiǵyra kóńil aitady.
Jol apatynan Balqash qalasyndaǵy "Jezqazǵan meditsinalyq ortalyǵy" JShS emhanasynyń 2 dárigeri qaza bolyp, 8 meditsina qyzmetkeri zardap shekti. Dárigerler Balqash qalasyndaǵy "Qazaqmys" kompaniiasynyń jumysshylaryn profilaktikalyq qarap-tekserýden ótkizip, qaityp kele jatqan bolatyn. Olar mingen avtobýs MAZ markaly júk avtokóligimen soqtyǵysyp, jol apatyna ushyrady.
Ministrlik atynan mezgilsiz kóz jumǵan Viktoriia Kenjehanova men Baqyt Qystaýbaeva jaqyndary men otbasyna qaiǵyra kóńil aitamyz.
Otolaringolog Viktoriia Kenjehanova men oftolmolog dáriger Baqyt Qystaýbaeva azamattardyń densaýlyǵyn qorǵaýǵa ondaǵan jyl ǵumyryn sarp etken naǵyz kásibi mamandar edi. Aimaqtyq densaýlyq saqtaý salasy orny tolmas aýyr qazaǵa dýshar boldy", - delingen ministrlik habarlamasynda.
Eske salaiyq, jol apaty 19 qyrkúiekte saǵat 19:30 shamasynda "Almaty - Ekaterinbýrg" tasjolynda, Saryshaǵan kentinen 30 shaqyrym jerde boldy. Tasjolda MAZ júk kóligi men PAZ jolaýshylar avtobýsy soqtyǵysty. Saldarynan barlyǵy 4 adam qaza boldy. Kólik apaty kezinde avtobýsta 11 adam otyrǵan.
