Nura aýdanynyń Kárim Myńbaev aýylynan shyǵyp, joǵalyp ketken 63 jastaǵy kásipkerdiń denesi tabyldy. Bul týraly Tótenshe jaǵdailar ministrliginiń baspasóz qyzmeti málim etti.
"5 mamyrda Nura aýdanynda júrgizilgen uzaq izdeý jumystarynyń nátijesinde Qaraǵandy oblysy Tótenshe jaǵdailar departamentiniń qutqarý bólimsheleri Tassýat aýlynyń mańynan 8 sáýirde joǵalyp ketken, 1958 jyly týǵan N.H.Súleimenovtiń máiitin tapty", - delingen habarlamada.
Qutqarýshylar joǵalǵan adamdy 10 sáýir men 5 mamyr aralyǵynda Nura ózeniniń arnasy boiymen izdegen.
"Traldaý ádisimen 32 shaqyrym, eholotpen 23 shaqyrym izdedik, vizýal túrinde 75 shaqyrymdy qaradyq, kvadrokoptermen 35 shaqyrymdy tekserdik. Jaiaý júrip, jaǵalaý aimaǵy sý betiniń 17 shaqyrymy qaraldy. Sondai-aq, Nura ózeniniń mańyndaǵy 45 shaqyrym jer jaiaý tekserildi. 1 200 sharshy metr aýmaǵynda súńgýirler jumys júrgizdi. TJD kinologiialyq bólimi 18 shaqyrymdy tekserdi. Sýda júzetin kemeler ózen arnasynyń 170 shaqyrymyn qarap shyqty. Izdestirý jumystaryna tikushaq jumyldy. Sonymen qatar aerovizýal tekserý úshin motorparaplandar qoldanyldy, olar shamamen 30 shaqyrymdy qarady.
Soǵan qaramastan, qutqarýshylar úmitin úzbei, bir jerdi birneshe ret tekserip, jedel izdestirý jumystaryn toqtatpady. Marqum jaǵalaýdan 50 metr tómende, kólik tabylǵan tustan tórt shaqyrym jerden tabyldy", - dedi TJM ókilderi.
Nurlan Súleimenov sharýa qojalyǵynyń basshysy jáne Nur Otan depýtaty bolǵan. Ol 8 sáýirde Qaraǵandy oblysynyń Nura aýdanynda joǵalyp ketken. Keiin onyń jol talǵamaityn kóligi, qalpaqshasy men syrt kiimi Nura ózeninen tabylǵan bolatyn.
